نړيواله اداره آکسفام: په غزه کې بشري ناورين روان دی
پارس ټوډی - نړيوالې ادارې «آکسفام» په يوه اعلاميه کې ويلي، چې په غزه تړانګه کې بشري کړکېچ بې ساري کچې ته رسېدلی او قحطي په ټوله سيمه کې خپره شوې ده، او ټينګار يې کړی، چې لوږې د ګڼو غير نظاميانو ژوند اخيستی او په غزه کې يو بشري ناورين روان دی.
د پنجشنبې په ورځ دې اعلاميه کې آکسفام زياته کړې، چې د نړيوالې ټولنې دوامداره چوپتيا او د امدادي ادارو د تکراري خبرداريو ته د مناسب ځواب نشتوالی، د غزې خلک له سختو کړکېچونو لکه ناسمې تغذيې او د اوبو ککړتيا سره مخ کړي، چې په اوسني ناوريني او بې ساري حالاتو کې يې کړاوونه نور هم زيات کړي دي.
دا اعلاميه په داسې حال کې خپره شوې، چې د غزې تړانګې لارې له ۱۴۰ ورځو راهيسې د اسرائيلي رژیم لخوا په بشپړه توګه تړل شوې دي، دا اقدام د اوربند او د اسيرانو د تبادلې په اړه د پخواني تړون سره سره د اشغالګر رژیم لخوا تر پښو لاندې شوی دی.
