د کونډو او سرپرستو مېرمنو ژوند له ګواښ سره مخ دی
د ملګرو ملتونو د خوړو نړیوال پروګرام وايي، چې د دوی د بودیجې کمښت د کونډو او هغو کورنیو ژوند له ګواښ سره مخ کړی، چې ښځې یې اداره کوي.
د آزادۍ راډیو د خبر له مخې، دا څرګندونې داسې وخت کېږي، چې د ملګرو ملتونو ګڼو همکارو ادارو ویلي چې روان میلادي کال د بودیجې له کمښت سره مخامخې دي او دې ستونزې اړو کسانو ته د بشري مرستو رسولو چارې هم اغېزمنې کړې دي.
په افغانستان کې د خوړو نړیوال پروګرام ویاند وحید الله اماني ویلي چې د خوراکي توکو د مرستې رسونې محدودیت، کونډې او هغه کورنۍ اغېزمنې کړي، چې د ښځو له خوا اداره کېږي.
ملګرو ملتونو ویلي، چې په افغانستان کې بشري مرستو ته د اړو افغانانو شمېر په روان ۲۰۲۳م کال کې، ۲۹ میلیونو ته نږدې شوی دی.
په افغانستان کې مخکې هم په میلیونونو کسان بشري مرستو ته اړ وو، خو پر افغانستان د طالبانو د ولکې له بیاټینګولو وروسته، په دغه هېواد کې اقتصادي کړکېچ لا پسې پراخ او بشري مرستو ته د اړو کسانو شمېر لا زیات شو.
وروستیو بدلونونو ښځې او نجونې ډېرې اغېزمنې کړې. نجونې تر شپږم ټولګي پورته نور تعلیم نه شي کولای او د پوهنتون له زده کړو هم منع شوې دي.
په ګڼو دولتي ادارو کې ښځې له کاره ایستل شوي، دغه راز په غیردولتي موسسو او د ملګرو ملتونو په اړوندو ادارو کې هم د ښځو د کار مخنیوی شوی دی.
