د ډالرو له تسلط سره د یورو او ملي اسعارو سیالي

پارس ټوډې - د اروپا د مرکزي بانک مشرې اعلان وکړ چې یورو کولای شي په نړۍ کې د امریکا د ډالرو پر وړاندې یو پیاوړی بدیل شي.

د نړیوالو بانکونو او پانګونې صندوقونو مدیرانو خبرداری ورکړی چې د امریکا د ولسمشر ډونالډ ټرمپ د بې ثباته پالیسیو او د سوداګریزو خنډونو د زیاتوالي له امله، د ډالرو موقف له خطر سره مخ دی.

د پارس ټوډې د راپور له مخې، د اروپا د مرکزي بانک مشرې کریسټین لاګارډ تېره اونۍ اعلان وکړ چې که یورويي زون چې ۲۰ غړي هېوادونه لري، وکولای شي خپل مالي او امنیتي چوکاټونه اصلاح کړي، نو دا اسعار کولای شي په نړۍ کې د امریکایي ډالرو پر وړاندې یو پیاوړی بدیل شي.

لاګارډ ټینګار وکړ چې د واشنګټن اقتصادي پالیسۍ د دې لامل شوي چې نړیوال پانګوال په ډالرو کې خپلې تړلتیا باندې بیا غور وکړي. هغې زیاته کړه: اوسنيو بدلونونو د یورو نړیوال کېدو لپاره لاره هواره کړې ده. خو یورو په اتوماتيک ډول تسلط نه شي ترلاسه کولای؛ باید د هغه لپاره مبارزه وکړي.

خو دا به ټوله کېسه نه وي، ځکه چې د دې راپور له مخې، یورو هم له ورته ستونزو سره مخ ده. له هغه وخته چې په ۲۰۲۲ کال کې د اوکراین د جګړې په غبرګون کې پر روسیې د لوېدیځ بندیزونه ولګول شول، مسکو او د هغې سوداګریزو شریکانو په زیاتیدونکې توګه د ډالرو او یورو کارول پریښودل او د ملي اسعارو کارونې ته یې مخه کړه.

د روسیې رسمي معلومات ښیي چې تېر کال د بریکس له غړو سره د روسیې ۹۰ سلنه سوداګري په داخلي اسعارو سره ترسره شوې وه.