مدودف: روسیه نړیواله جګړه نه‌ غواړي

د روسیې د امنیت شورا مرستیال دیمیتري مدودف ویلي، نړۍ اوس یو «ډېر خطرناک» پړاو ته داخله شوې، خو مسکو د درېیمې نړیوالې جګړې غوښتونکی نه‌دی.

مدودف خبرداری ورکړی چې د نړیوالو لوبغاړو د زغم کچه ټیټه شوې او د ناسمې محاسبې خطر زیات شوی دی. هغه وویل، روسیه «لیونۍ» نه‌ده او د جګړې هڅې نه غواړي، خو د بشپړ رد امکان یې هم کم نه ګڼي.

مدودف لوېدیځ تورن کړ چې د روسیې امنیتي اندېښنې یې له پامه غورځولي او د مسکو د «سرو کرښو» د نه منلو له امله د کړکېچ پراخېدو خطر زیات شوی دی.