د ټیلرسن او سپينې ماڼۍ ترمینځ اختلافات ډیر زیات شوي
د ټرمپ د انډیوالانو او د امریکې د حکومت د ځینو غړو ترمینځ د قدرت د جنګ په دوام کښې د دغه هیواد د بهرنیو چارو وزیر بیا هم د دغې وزارتخانې په چارو کښې په دخالتونو نیوکه وکړه.
د پولیټیکو ویب سایټ په لیکنه، د امریکې خارجه وزیر رکس ټیلرسن د بهرنیو چارو د وزیر په کار کښې د مداخلې په وجه د دغه هیواد د ولسمشر په زوم جراډ کوشنر او په ملګرو ملتو کښې د امریکې په استازې نکي هیلی او د ټرمپ د ملي امنیت په سلاکار هربرټ مک مسټر باندې په نیوکې سره وویل: امریکا په یو وخت څلور خارجه وزیران نه شي لرلی.
ټیلرسن څرګنده کړه: کوشنر په اسرائیلو او فلسطین پورې د اړوندو چارو مسئول دی خو کله کله له میکسیکو او چین سره د امریکې په اړیکو کښې هم دخالت کوي.
د دې خبر له مخې د سپينې ماڼۍ د دفتر مشر جان کلي هم په بهرني سیاست پورې اړوندو مسائلو په لړ کښې په کوشنر نیوکه کړې ده.
د امریکې د خارجه وزیر ټیلرسن او د سپينې ماڼۍ د ځینو چارواکو ترمینځ اختلافات دومره زیات شوي دي چې ویل کیږي هغه د استعفا ورکولو نیت لري او ډونلډ ټرمپ د هغه د بدیل د ټاکلو په انتخاب غور کوي.
