چین په افغانستان کښې د صلحې له بهیره ملاتړ وکړ

د چین حکومت د افغانستان د حکومت او طالب ډلې ترمینځ د صلحې د خبرواترو له بهیره ملاتړ کړی دی.

د چین خارجه وزیر وانګ يي په قطر کښې د افغانستان د حکومت او طالب ډلې ترمینځ د صلحې د بهیر په هکله وویل: چین د افغانستان د نورو ګاونډیانو ترڅنګ، په دغه هیواد کښې د صلحې او روغې جوړې بهیر ته ډیر اهمیت ورکوي او هیله مند دی چې ټول لوري د افغانستان د مسئلې د هوارې لپاره یوه اغیزناکه سیاسي حل لاره پیدا کړي.

وانګ يي زیاته کړه: په افغانستان کښې زرترزره د جنګ ختمیدل د دغه هیواد، د سیمې د هیوادونو او د نړیوالې ټولنې ډیره مهمه غوښتنه ده.

د چین خارجه وزیر د خپلې وینا په یوه بله برخه کښې وویل: ځیني بهرني قدرتونه په مختلفو پلمو د سیمې د هیوادونو په کورنیو چارو کښې د لاسوهنې او د (رنګي انقلابونو) د یو نوي پړاؤ د پیلولو په لټه کښې دي.