آسمانی وږمی (۹)

ډیرو محترمو دوستانو!د روژې د مبارکې میاشتې له ارزښتمنو شیبو د پوره استفادې د توفیق په دعا سره د آسمانی وږمو د یوې بلې برخې اوریدلو ته مو پام غواړو چې پکښې د هغو کسانو ځانګړنې څیړو،له کومو چې یو مومن انسان پیروی کوی،نو راسره مله اوسئ .

خوږو ملګرو! د  روژې  د مبارکې میاشتې  یوه ځانګړنه  دا ده چې قرآن مجید پکښې نازل شوی هغه هم  په قدر شپه چې د برخلیک د ټاکلو او پلانونې شپه ده .باید  وپوهیږو چې  د قران د نازلیدا  فلسفه ،د خدای او پیغمبر  د حکمونو  او فرمایشاتو پیروی او د منع کړی شویو چارو یې پریښودل دی  چې  په  تیرو دوو پروګرامونو  کښې په دې باب  خبرې وشوې . په  دغه  پروګرام  کښې  د خدای  او  پیغمبر  له  حکمونو  د پیروی  او  اطاعت  پایله  څیړو.باید  وویل  شی  چې  په  دنیا  کښې  د  خدای  او رسول  د اطاعت  ارزښتمنه  پایله ، وګړنیزه  نیکمرغی ،په درستې  اسلامی  نړۍ  کښې  په  ګردو  اعتقادی،فکری، اجتماعی او  سیاسی  اړخونو کښې  د  وحدت  ټینګول ، د لانجو،اختلافاتو  او  تفرقې  مخه  نیول  او  د مسلمانانو  د  عزت  او  قدرت  ساتنه  ده په تل پاته  او همیشنی دنیا  کښې  یې  هم بریا  ښه عاقبت  او  بدله  او  له  هغو  غوره  او  لوړو  بیلګو  سره  ناسته  پاسته  ده چې  هره  ورځ  په  خپلو  لمانځونو  کښې   په    الهی  درګاه  کښې  هم  دا  دعا  کوو چې  اهدنا الصراط المستقیم ، صراط  الذین انعمت  علیهم...... یعنی  مونږ  سمې  لارې  ته  هدایت  کړی ، د  هغو  کسانو  لاره  چې نعمت   دې  پرې  لوریلی .

--- اوس  دا  پوښتنه  مطرح  کیږی چې  هغه  څوک  دی  چې مونږ  شپه  او  ورځ  په  خپلو  لمانځونو  کښې  کله  چې  د  عالمینو  له  پالونکی  سره  د  راز  او  نیاز  لپاره  دریږو،دا  دعا  کوو ،مونږ  ته  د  هغوئ  سمه  لاره  وښئ ؟ قرآن  مجید  په  خپله  هغه  کسان  راپیژنی  او  د  نساُ سورې  په  ۶۹م  آیت  کښې  فرمایی:څوک چې د خدای  او  پیغمبر  اطاعت  کوی  په  تلپاته  دنیا  کښې  به  له  داسې  کسانو  سره  ناسته پاسته  ولری چې  خدای  ورته  نعمت  بخښلی  دی .پیغمبران،صدیقان، شهیدان او صالحان  او  دغه  ډیر  غوره  ملګری  او دوستان  دی؛                                                                              نوځکه  د  دې  لپاره  پر  الهی  سمې  لارې  ګام  کیښودل  شو او  د  مهربان  څښتن  په  فضل  و کرم  کښې  شامل  شو باید  پر  اساسی  اصل  عمل   وکړل  شی یعنی  له  خدای  او  پیغمبره  اطاعت  وکړو. دا  عمل  هم  باید  سطحی  نه  وی  بلکې  په  هر  زمان  او  مکان  کښې  د  ژوند  په  ټولو  ټیټو  هسکو  کښې  دوام  ولری. باید  پام  ولرل  شی  چې  په  دغه  آیت  کښې  د  راتلونکی  فعل  کارول  شوی چې  د  همدغې  اساسی  خبرې  ښودنه  کوی .

=== اوس  دغه  پوښتنه  په  ذهن  کښې  راپورته  کیږی چې  لوی  خدای  ولې  د  پیغمبرانو، صدیقانو،شهیدانو او  صالحانو  څلور  ډلې  معرفی  کړی  دی  او  وتلی  ځانګړنې  یې  کومې  دی؟ په  دې  کښې  هیڅ  شک  نشته  چې  درستو  الهی  پیغمبرانو  نه  یوازې  په  خپله  په  سمې  او  نیغې  لارې  حرکت  وکړ  بلکې  د  خپلې  ټولنې  د  لارښونې  او  له  بې  لاریتوبه  د  ژغورنې  لپاره  یې  خپلې  ټولې  هلې  ځلې  وکارولی  او  هڅه  یې  وکړه  خلک  هم  مستقیمې  لارې ته   ستانه  کړی . د نبیانو  بل  توحیدی  اقدام ،د شرک  له  واکمنیو  سره  مبارزه  او  د  الهی  عادلانه  نظام  ټینګول  وو. هغوئ  د  خپل  رسالت  پر اساس د انسانی  او اخلاقی  ارزښتونو د احیا  کولو  لپاره  له  ناوړه  ارزښتونو  سره  مبارزې  ته  مخه  کړه او  تر  وروستۍ  سلګۍ  یې  له  ګردو  ګواښونو  سره  مقابله  وکړه . د  همدغو  ځانګړنو  په  خاطر متعال  خدای  خپل  پیغمبران  د  توحیدی  نیغې  لارې  د  لارویانو  د  بیلګې  او  اسوې  په  توګه  معرفی  کوی .

--- د قران  د نساَ سورې  په  ۶۹ م آیت  کښې  ورپسې  ډله  صدیقان  معرفی  کوی یعنی  هغه  کسان  چې  ډیر  ریښتونی  دی .دا  هغه  کسان  دی  چې  خدای  پرې  نعمت  لوریلی  او  پر  سمه  الهی  لاره  حرکت  کوی .داسې  کسان  چې  له  زړه  یې  ایمان  راوړ ،د خدای  او پیغمبر  اطاعت  یې وکړ او  په  صداقت  سره  له نبیانو  سره  ګام  په  ګام او  دتوحیدی باورونو  له  حریمه  د  دفاع  لپاره د  هغوئ  تر څنګ  پاته  شول ، یوه  شیبه  په  کراره کښینناستل او  دهیڅ  ډول  ګواښ  او  تمې  تر  اغیز  لاندې  و نه  ګرځیدل . د  شرک  او  کفر  نظامونو  او  سرغنو چې  خپلې  ګټې  او  موقعیت  یې  په  خطر  کښې  لیده ،د  توحیدی  واکمنیو  د  ختمولو او  ورته  د  ماته  ورکولو  لپاره به  یې  د  وینې  بهولو  او  جنګ  اور  غړغړانده  کاوه .په  دغه  ډول  شرایطو  کښې   د  شهیدانو  ځلانده  څیره  ښکاره  کیږی  چې  د  توحیدی نظامونو  او  لیدتوګو  د  نیالګی  د  غوړولو  او  ساتنې  لپاره  یې  د  پیغمبرانو  په  لارښونه  تر  وروستۍ  سلګۍ  مقاومت  وکړ  او  په  الهی  فضل  او  رحمت  کښې  وګرځیدل . هغوئ  د  هغو  کسانو  لپاره عملی  لارښود  وګرځیدل  چې  په  صداقت  سره  یې  پریکړه  وکړه  چې  له  خدای  او  پیغمبره  په  پیروۍ  سره  په  الهی  سمې  لارې  یون  وکړی .

=== هغه  وروستۍ  ډله  چې  قران  پاک  د پیغمبرانو،صدیقانو  او  شهیدانو  په  کتار  کښې  یې  نوم  واخیسته ، هغه نیکچاری  او  صالحان  دی  چې  د  خدای  او  رسول  د   اطاعت  له  نعمته  برخمن  دی  او د  خدای  پر  سمې  او  مستقیمې  لارې  ګام  اوچتوی . صالحان  نه  یوازې  په  خپل  نیک  او  صالح  دی  بلکې  د  ټولنې  د  اصلاح  او  دهغو  ارزښتونو د  ساتنې  په  لاره  خپلې  پوره  هڅې  کاروی  چې پیغمبرانو د  بنسټ  کیښودلو  او  ساتنې لپاره  هڅه  وکړه او  په  دې  لاره  کښې  د  شهیدانو  پاکه  وینه توی  شوه . دا  یوه  داسې  ډله  ده چې  په  ګفتار  او  عمل  کښې د  خدای  او  پیغمبر  د  اطاعت  روحیه  لری . په  تلپاته  الهی  جنت  کښې  له  هغوئ  سره  د  ناستې  پاستې  توفیق  مومی  او  د  هغوئ  تګلارې  په  پیروی  سره  پر  سمه  الهی  لاره  روان  او  له  ستر  الهی  نعمته  برخمن دی .که  څه  هم  د  دغې  لارې  په  کچ  کولو  کښې  د  هغوئ  هڅې  رول  لری  خو  که  د  خدای  فضل  او کرم  پر ې  نه  وی  او الهی  توفیق  ونه  لری  نو  د  خدای  په  درګاه  کښې  د  غوره  کسانو  پر  نیغې  لارې  د  ګام  کیښودل به  امکان  و نه  لری .ځکه خو د  دغه  آیت  په  پای  کښې  دا  خبره  راغلی چې  د  خدای  له  لوری ستر  فضل  او  لورینه  ده .داسې  خدای  چې  د  انسانانو  د  پیژندنې  لپاره  یې  علم  او  پوهه  بسنه  کوی .

--- دا  خبره  هم  باید  په  پام  کښې  ولرل  شی چې  د  خدای  فضل  او  مهربانی بې  وجې  او له  وړتیا  پرته  نه  وی .داسې  کسان  له  الهی فضل  او  کرمه   برخمنیږی  چې  د خپلو وګړنیزو  او  ټولنیزو  مسئولیتونو  او  دندې  د  پوره  کولو  لپاره  یې  خپلې  هیڅ  ډول  هڅې  نه  وی  سپمولی  او خپلې  پوره  هڅې  یې  کړی  وی .لکه  څنګه  چې  د  دغه  آیت  په  پیل  کښې  د  خدای  او  پیغمبر  د  اطاعت  اصل  بیان  شوی  او تر  څنګ  یې  هغه  کسان  ذکر  شوی  چې دغه  لوړ  مقام  ته  لاره  مومی،او  په  حقیقت  کښې  همدغو  کسانو یو ستر  معنوی  او تلپاته بریالیتوب  ترلاسه کړی دی .لکه  څنګه  چې  الله تعالی  د قران کریم  د احزاب  سورې  په  ۷۱م  آیت  کښې  فرمایی:                      ځوک چې  د  خدای  او د هغه  د  رسول  اطاعت  کوی،بې شکه  ستر  بریالیتوب  ته  رسیدلی دی .       آیا  تر  دې  ستر  بریالیتوب  بل  شته چې  انسان  په  ابدی  دنیا  کښې د پیغمبرانو،صدیقانو، شهیدانو او  صالحانو  په  څیر  ملګری  او  دوستان  ولری؟

په دې هیله او  دعا  سره  چې  مهربان  څښتن  مونږ  ته  هم  دا  توفیق راکاندی  چې د خدای  د  سمې  لارې  له  دغو  بیلګو  په  پیروۍ  سره  په  جنت  کښې  ورسره  ناسته  پاسته  او  ملګرتیا  ولرو،خپل  ننی  پروګرام  همدلته  پای  ته  رسوو او له  درانه  حضوره  مو  اجازه  غواړو .