Juristi iranian: SHBA e përfshirë drejtpërdrejt në zhvendosjen e 40 milionë njerëzve në mbarë botën
Një anëtar i lartë i Këshillit Kushtetues të Iranit tha se Shtetet e Bashkuara të Amerikës kanë qenë dhe janë të përfshira drejtpërdrejt në zhvendosjen e rreth 40 milionë njerëzve në 85 vende anembanë botës, duke kryer operacione ushtarake.
"Shtetet e Bashkuara të Amerikës nuk duhet të pretendojnë se mbrojnë të drejtat e njeriut, sepse ato janë shkelësit kryesorë të të drejtave të njeriut në komunitetin ndërkombëtar", tha të hënën në Teheran kreu i Institutit Kërkimor të Këshillit Kushtetues, Abbas Ali Kadkhodaei, në një konferencë ndërkombëtare mbi shkeljet e të drejtave të njeriut nga ana e Perëndimit.
Ai shtoi se ata që pretendojnë se mbrojnë të drejtat e njeriut janë thjesht duke përhapur gënjeshtra të bazuara në kritere me standarde të dyfishta.
Juristi i shquar theksoi se të gjitha fetë hyjnore kanë theksuar rëndësinë e respektimit të parimeve të të drejtave të njeriut.
Kadkhodaei tha se racizmi është ndër krimet kryesore të kryera nga SHBA-ja, duke shtuar se shtetet amerikane dhe evropiane vazhdojnë të ndjekin politika raciste.
Ai tha se SHBA-të kanë kryer krime të shumta brenda dhe jashtë vendit, duke përmendur si provë ngjarjet në Gjirin e Guantanamos.
Fokusi i konferencës është të shqyrtojë shkeljet e të drejtave të njeriut nga SHBA-ja dhe vendet perëndimore, si brenda kufijve të tyre, ashtu edhe në pjesë të tjera të botës.
