Irani do t'i bashkohet BRICS PAY për të shmangur problemet e shkaktuara nga SWIFT
Kryetari i Parlamentit iranian, Mohammad Bagher Kalibaf tha se Irani së shpejti do t'i bashkohet BRICS PAY, një sistem bankar elektronik i përdorur nga aleanca BRICS, mes planeve të Teheranit për të shmangur kufizimet bankare të shkaktuara nga sanksionet e SHBA.
Duke folur të shtunën në një seancë të hapur të Parlamentit iranian, Kalibaf tha se Irani do të hyjë në sistemin BRICS PAY që nga 1 janari 2024. "Kjo na jep një mundësi të madhe për të punuar me vendet e mëdha," tha ai ndërsa shtjelloi tregtinë në rritje midis Iranit dhe anëtarëve origjinalë të BRICS, përkatësisht Brazilit, Rusisë, Indisë, Kinës dhe Afrikës së Jugut. Irani u ftua të bashkohej me BRICS më 24 gusht si pjesë e një vendimi nga blloku për të pranuar gjashtë anëtarë të rinj. Kalibaf i bëri komentet pas një vizite në Afrikën e Jugut ku mori pjesë në një takim të kryetarëve të parlamenteve të BRICS. Ai tha se qasja e Iranit në sistemin e ri bankar do të eliminonte nevojën për akses në SWIFT, i cili e ka ndaluar Iranin nga shërbimet e tij gjatë viteve të fundit për shkak të sanksioneve të SHBA. Kryetari i Parlamentit iranian tha se Kina, Rusia, India dhe Afrika e Jugut përbëjnë rreth 30% të të gjithë tregtisë së Iranit, duke shtuar se BRICS PAY do të ishte një nxitje e madhe për përpjekjet e Iranit për të ruajtur dhe rritur marrëdhëniet e tij tregtare me pjesën tjetër të botës. Ai e përshkroi krijimin e sistemit të pagesave si një arritje të madhe për BRICS sepse lehtëson tregtinë duke reduktuar nevojën për akses në sistemet e dominuara nga perëndimi si SWIFT.
