Marina e Iranit ka sekuestruar një cisternë nafte amerikane me urdhër të gjykatës
Marina e Republikës Islamike të Iranit ka njoftuar sekuestrimin e një cisterne nafte amerikane me vendim gjykate në Detin e Omanit.
Operacionet e Tregtisë Detare të Mbretërisë së Bashkuar (UKMTO) identifikuan cisternën Saint Nikolas me flamur të Ishujve Marshall, duke thënë se u nis rreth orës 7:30 të mëngjesit (0330 GMT) nga porti Sohar në Oman dhe ndryshoi kursin drejt portit Xhask në Iran.
Ambrey, një kompani britanike e rrezikut detar, tha se cisterna e riemëruar kohët e fundit ishte ndjekur penalisht dhe gjobitur më parë për transportimin e naftës iraniane, e cila u konfiskua nga autoritetet amerikane.
“Irani ka ndërmarrë më parë veprime kundër atyre që i ka akuzuar për bashkëpunim me SHBA-në”, shtoi kjo kompani.
Anija ishte ngarkuar me 145,000 ton naftë bruto në Basra, Irak dhe ishte destinuar për në portin Aliaga në Turqi nëpërmjet Kanalit të Suezit, tha kompania e menaxhimit të cisternës me bazë në Greqi, Empire Navigation.
“Pas shkeljes në rastin e anijes Suez Rajan në prill dhe vjedhjes së naftës iraniane nga Shtetet e Bashkuara, cisterna e naftës e riemërtuar Saint Nikolas u sekuestrua në shenjë hakmarrjeje mëngjesin e sotëm me urdhër të gjykatës dhe miratimin e Organizatës së Porteve dhe Transportit nga Marina Strategjike e Ushtrisë së Republikës Islamike të Iranit dhe u transferua në portet iraniane”, njoftoi agjencia iraniane e lajmeve Fars.
Cisterna, tha ajo, kishte vjedhur ngarkesën e naftës që i përkiste Republikës Islamike të Iranit nën urdhrin e Shteteve të Bashkuara dhe e kishte transferuar atë në portet amerikane dhe e kishte vënë në dispozicion të autoriteteve amerikane.
Cisterna Suez Rajan me flamur të Ishujve Marshall që transportonte naftë iraniane u kap ilegalisht nga Uashingtoni në prill 2023 nën maskën e "një operacioni të zbatimit të sanksioneve" dhe u drejtua drejt portit të Teksasit.
