Ghalibaf: Izraeli ndërmori një sërë atentatesh për të parandaluar zhdukjen e tij
Kryetari i Parlamentit iranian Mohammad Baker Ghalibaf tha se Izraeli kishte ndërmarrë një seri atentatesh kundër komandantëve të Rezistencës në një përpjekje të dëshpëruar për të parandaluar shkatërrimin e tij.
Ghalibaf i bëri komentet të dielën (29 shtator), dy ditë pasi Izraeli vrau Sejed Hasan Nasrallah, udhëheqësin legjendar të lëvizjes së rezistencës libaneze Hezbollah, në një sulm ajror në Bejrutin jugor duke përdorur bomba të furnizuara nga Shtetet e Bashkuara.
Ky akt terrorist vjen pothuajse një vit pas fillimit të gjenocidit në Rripin e Gazës dhe sulmeve ajrore vdekjeprurëse kundër Libanit.
“Armiku sionist dështoi të arrijë qëllimet e tij dhe u mund në fushën e betejës, prandaj filloi të kryejë atentate për të mbijetuar dhe për të parandaluar zhdukjen e tij”, tha Ghalibaf gjatë një seance publike të Parlamentit.
“Nuk është regjimi sionist ai që ka avantazhin, por përkundrazi, ai ka adoptuar metodat taktike të atentatit dhe të luftës psikologjike në një akt dëshpërimi për të kompensuar humbjet e tij strategjike", tha Kryeparlamentari iranian.
Ghalibaf vuri në dukje se struktura e Hezbollahut ishte forcuar për dekada në mënyrë të tillë që mund të mbushte vendin e lirë të komandantëve të tij në një kohë të shkurtër.
Ai tha se Shtetet e Bashkuara janë bashkëpunëtore në të gjitha krimet e regjimit sionist dhe duhet të pranojnë pasojat e veprimeve të tij.
“Irani e konsideron forcimin e Rezistencës si një shtyllë strategjike të sigurisë së tij kombëtare kundër agresorëve sionistë dhe nuk do të hezitojë të ndihmojë Rezistencën në bazë të një dekreti të Liderit Suprem të Revolucionit Islamik”, nënvizoi Ghalibaf.
Kryetari i Parlamentit iranian iu referua një deklarate të bërë të shtunën nga Ajetollah Khamenei, i cili tha: "Të gjithë myslimanët duhet të qëndrojnë pranë popullit libanez dhe Hezbollahut me burimet e tyre dhe t'i ndihmojnë ata të përballen me regjimin mizor dhe të ligë të Izraelit".
