Kryeministri i Irakut kërcënon të japë dorëheqjen nëse ngërçi politik vazhdon
Kryeministri i Irakut Mustafa al-Kadhimi ka kërcënuar se do të japë dorëheqjen nëse vazhdon ngërçi politik që e ka lënë vendin të paaftë për të formuar një qeveri të re që nga zgjedhjet parlamentare të tetorit të kaluar.
Duke folur të martën, Kadhimi tha se ai mund të "lirojë postin e tij" në shenjë proteste për pasigurinë politike, dhe shtoi: "Mjaft me dyfytyrësinë e aktorëve shtetërorë dhe joshtetërorë". Dhuna shpërtheu në kryeqytetin Bagdad pasi kleriku i shquar shi'it Moktada al-Sadr tha të hënën se ai po jepte dorëheqjen nga politika dhe po mbyllte zyrat e lëvizjes së tij. Mbështetësit e Sadrit të hënën hoqën barrierat jashtë ndërtesës qeveritare dhe thyen portat e saj. Ushtria irakiane njoftoi një shtetrrethim mbarëkombëtar, por përleshjet e armatosura u ndezën gjatë natës. Të paktën 30 njerëz u vranë dhe 700 të tjerë u plagosën në dy ditët e trazirave, të cilat erdhën pas tre vjet stabiliteti relativ në Bagdad. Kadhimi tha se një komision hetimor ishte formuar për të hetuar origjinën e armëve që u përdorën në përleshjet e fundit. Protestuesit irakianë janë tërhequr nga Zona e Gjelbër e sigurisë së lartë në kryeqytetin Bagdad, pasi kleriku i shquar shi'it i vendit Moktada al-Sadr u bëri thirrje ndjekësve të tij që t'i japin fund dhunës. Sadr u kishte dhënë protestuesve irakianë dhe ndjekësve të tij 60 minuta kohë për t'u larguar nga zona e sigurisë së lartë, ndërsa i kërkoi falje popullit irakian. “Më trishton shumë ajo që ndodhi në Irak, i kërkoj falje popullit irakian, të vetmit të prekur nga ngjarjet e fundit”, u tha Sadr gazetarëve duke shtuar: “Ne kishim shpresuar se do të kishte protesta paqësore, jo me armë". Udhëheqësi i lëvizjes Sadr tha: "Unë tani po kritikoj revolucionin e lëvizjes Sadriste, ashtu siç kritikova revolucionin e tetorit kur u ndot nga dhuna". Ai shtoi: "Ndryshoni mendjen dhe tërhiquni plotësisht, madje edhe nga protestat paqësore." Kryeministri i Irakut Mustafa al-Kadhimi tha se thirrja e Sadrit për të ndaluar dhunën tregon nivelin më të lartë të patriotizmit dhe dëshirës për të ruajtur gjakun irakian. “Thirrja e shkëlqesisë së tij Moktada Al-Sadr për të ndaluar dhunën është mishërimi i patriotizmit dhe respektit ndaj shenjtërisë së gjakut irakian”, shkroi Kadhimi në një postim në Twitter.
