Numri i të vdekurve nga përmbytjet në Libi është rritur në 11,300
Numri i të vdekurve nga përmbytjet katastrofike në qytetin lindor Derna të Libisë është rritur në 11,300, thanë Kombet e Bashkuara në një përditësim të shtunën, duke cituar Gjysmëhënën e Kuqe Libiane.
10,100 persona të tjerë janë ende të zhdukur në qytetin e shkatërruar, tha Zyra e OKB-së për Koordinimin e Çështjeve Humanitare, duke përdorur shifrat e Gjysmëhënës së Kuqe Libiane. Në Libinë lindore jashtë qytetit Derna, përmbytjet morën 170 jetë të tjera, thuhet në përditësimin e Zyrës së OKB-së për Koordinimin e Çështjeve Humanitare. “Këto shifra pritet të rriten ndërsa ekuipazhet e kërkim-shpëtimit po punojnë pa u lodhur për të gjetur të mbijetuarit”, thuhet në përditësimin e OKB-së. Gati një javë pasi stuhia Daniel goditi verilindjen e Libisë, "situata humanitare mbetet veçanërisht e zymtë në Derna" dhe problemet e rënda të ujit të pijshëm kanë kapluar qytetin dhe të paktën 55 fëmijë u helmuan nga pirja e ujit të ndotur, thekson raporti. Në zonat përreth, shumica e të cilave kanë përjetuar vite të tëra konflikti të armatosur, OKB-ja paralajmëroi për rreziqet e zhvendosjes së minave tokësore nga ujërat e përmbytjeve, duke kërcënuar civilët libianë. Nga ana tjetër, Organizata Botërore e Shëndetësisë njoftoi se deri më tani në Libi janë nxjerrë nga uji i detit kufomat e 3985 personave.
