Qiproja i kërkon BE-së t'i japë fund statusit të Sirisë si një "vend i pasigurt"
Qiproja, një anëtare e Bashkimit Evropian, njoftoi se i ka kërkuar Bashkimit Evropian rishikimin e situatës në Siri dhe në të njëjtën kohë theksoi nevojën urgjente për të ndihmuar Libanin, i cili ka pranuar rreth 2.5 milionë refugjatë sirianë, dhe shprehu shqetësimin për pasojat që do të kishte Evropa nga kriza në Liban.
Sipas ISNA, Ministri i Brendshëm i Qipros, Konstantinos Ioannis, tha se do të përpiqet të bindë Bashkimin Evropian dhe Kombet e Bashkuara që t'i japin fund statusit të Sirisë si një vend i pasigurt çka e bën të pamundur që refugjatët sirianë të kthehen në vendin e tyre. Këto deklarata vijnë pasi një numër i madh refugjatësh, shumica e të cilëve janë sirianë, kanë mbërritur në Qipro me rrugë detare. Ioannis theksoi se Qiproja dhe vendet e tjera anëtare të BE besojnë se situata në Siri duhet të rishikohet. Ai theksoi se Bashkimi Evropian e ka lënë Sirinë pa asnjë ndryshim për 11 vjet dhe ekziston nevoja për të rishikuar situatën në Siri, sepse disa nga zonat e saj janë bërë të sigurta. Ai tha se aktualisht janë dy zona që Agjencia e Azilit e Bashkimit Evropian (EUAA) i njeh si zona të sigurta. Këto zona duhet të njihen si të sigurta në nivelin e vetë Bashkimit Evropian, në mënyrë që shtetet anëtare të mund të kthejnë refugjatët sirianë në këto zona. Për momentin, asnjë vend nuk mund ta bëjë këtë. Në një mesazh për Zëvendës Komisionerin e Bashkimit Evropian, Ioannis shtroi gjithashtu nevojën bazë për ndihmë për Libanin, i cili ka strehuar rreth 2.5 milionë refugjatë sirianë. Ai në këtë mesazh shkruan: "Informacioni që ne kemi nga autoritetet libaneze është se numri i sirianëve që shkojnë në Liban është rritur. Libani është një digë. Nëse Libani shembet, e gjithë Evropa do të përballet me probleme". Në muajt e fundit në Qipro kanë mbërritur një numër i madh refugjatësh, shumica sirianë, të cilët kanë shkuar në Qipro përmes detit nga Siria dhe Libani. Ioannis tha se qeveria e Qipros me masa të veçanta dhe me ndihmën e faktorëve të huaj, uli me 50% ardhjen e emigrantëve të paligjshëm dhe rriti kthimin e azilkërkuesve me 50%.
