Pompeo dhe Maas bisedojnë për situatën në Libi
Sekretari amerikan i shtetit, Mike Pompeo dhe ministri i jashtëm gjerman, Heiko Maas kanë zhvilluar një bisedë telefonike, ku kanë diskutuar për situatën në Libi, ka njoftuar Departamenti Amerikan i Shtetit.
Sekretari amerikan i shtetit Mike Pompeo dhe ministri i jashtëm gjerman Heiko Maas thuhet se kanë shprehur shqetësimin e tyre lidhur me shkeljen e embargos së armëve dhe rritjen e numrit të mercenarëve të përfshirë në luftimet në Libi.
Ndërkohë presidenti i Turqisë, Rexhep Taip Erdogan ka thënë se Rusia sponsorizon mercenarët në Libi. Këto komente ai i ka bërë teksa ka mbrojtur marrëveshjen e arritur ndërmjet Ankarasë dhe Qeverisë libiane, që udhëhiqet nga Fajez Serraxh dhe që mbështetet nga Kombet e Bashkuara.
Konflikti në Libi nisi më 2011, pas një revolte të armatosur që çoi në rrëzimin nga pushteti të Moamer Gaddafit.
Në Libi aktualisht janë dy qeveri: ajo që mbështetet nga OKB-ja e që është me seli në Tripoli dhe që udhëhiqet nga Fajez Serrxhj dhe qeveria tjetër që udhëhiqet nga komandanti Khalifa Haftar me seli në Tobruk.
Egjipti, Emiratet e Bashkuara Arabe, Arabia Saudite mbështetin qeverinë e Haftarit, ndërkaq Katari dhe Turqia mbështesin qeverinë në Tripoli.
