Əliyev hokuməti bardə antişiə siyasəti sənibəton ıştənış nişon doe.
İyunə manqi 10-də Lankoni qonə cinayəton məhkəmədə de Qəncə hadison əlağədar dəstqir bıə dindaron i qrupi məhkəmə bə orəx rəsə. Im məhkəmə iclasonən bənə navonə qrupon muhakimə be mass-media numayəndon iştiraki dəvardə.
Bımədən hokuməti məğsəd əve ki, çey bə Əhil Beyt (ə) aşiğon munasibətədə pesoxtə ittihamonku cəmiyyət xəbə qəte nızıno. Siyasiə Məhbuson Mudafiə Mərkəzi koordinator Oqtay Quləliyev istintaği qardışədə bə məhbuson qonə işqəncon doə, həmən ittihamnamə çanədə pesoxtəyo ibarət bıə fakton cəmiyyəti vədə faş karde səbəbiku bə DKV və Sər Prokuratura vanq kardışone və bey tars doşone ki, ım əməliku dast bıkəşo. Isət çe Quləliyievən Qəncə məhbuson vəziyyəti həxədə doə məlumaton xeyli kam bıə. Məmləkəti hətto dini saytonən bı barədə hiç qıley xəbə dərc kardedənin ki, əhali İlham Əliyevi bə Əhli-Beyt (ə) tərəfdaron qətə divoni şoyd bıbon.
Lankoni məhkəmə həmonə ruji bo Elmir Zahidovi, Taleh Qeyuşovi və Vusal Nuriyevi har kəsi 14 sor, bo Həbib İbrahimli və Pərviz Musayevi har kəs 12 sorinə, umumən 66 sorinə zindonə cəzo bırişe, de ım vonə ki, quya əvon dəvardə sori iyulə manqi 10-də Qəncədə vağeə bıə etirazə aksiyadə iştirak kardəşonebən. Hərçənd ki, əvon bə vaxt Qəncədə bıə nin. Imi subut kardə faktonən hestin. Ar-Rad TV xəbə doəşe ki, ım 5 nəfər dini fəal Xanım Həzrəte Zeynəb (ə) muğəddəsə hərəmi çe İŞİD-i terrorə dastəonku muhafizədə iştirak kardəşone. Boku hokuməti bə ım imoninə cıvonon bı ğədər beəmonə munasibət İlham Əliyevi bə Az.R Əhli-Beyt (ə) aşiğon divon qətə siyasəti hələən dəvom karde nişon dodə.
Bə yod buəmon ki, ey 2011-minə sori bə AİP, 2012-minə sori bə “Avrovijn”i etirazə aksiya fəalon, 2014-minə sori bə Hicabi ğədəğə etiraz kardə diniə fəalon, 2015-minə sori bə Nardarani dini cameə fəalon, 2018-minə sori bə Qəncə şəhəri dini icma aktiviston sə vardə jıqo mısibəton Boku hokuməti Az.R-ədə şion tuməbır kardə siyasət barde oşko nişon dodə.
