Imsor Azərbaycanə Respublika vıjoronədə mivə-tərəvəzi ğıyməton har sornəsə xeyli bohoe ki, ımən bə əhali noroziəti səbəb bedə. Əliyev hokuməti Sər vəziri muavin Əli Əhmədov de Di Təsərrufati vəzir İnam Kərimovi bahəm Boku “Havzə vıjor”ədə dəvardə di təsərrufati yarmarkadə və qıley supermarketədə bıən. Əhmədov ğıyməton boho beku norozi mandə, votəşe ki, “tovıstoni miyonə manqədə kartof bə 2 mənot bıe əzıni”.

Hokuməti barzəməğaminə məmuri bə problemi jıqo munasibət cəmiyyətədə bə muzakirə səbəb bıə. Ekspert Vahid Məhərrəmovi hokuməti ım hərəkət imitasiya hisob kardəşe, yəni bə əhali nişon bıdo ki, əvon de bohoçiəti mubarizə barde əzmədən. Əsl həğiğətədə məhsulon boho bıe səbəb ticarəti tamamən çe monopoliston inhisarədə bıeye ki, ım monopolistonən hejo de barzəməğaminə məmuron obastin. Əqər hokuməti həğiğətən de ərzaği boho bıe mubarizə barde pidəşebu, bəpe iminə nubədə ticarəti çe monopoliston əsarəti jitono beko, bı sahədə salemə rəğabəti bərğəror bıko. Bəvədə ğıyməton de vıjorə iğtisadiyyati əsasə ğaydə, yəni de tələb və təklifi nisbəti muəyyən bəbe.

Vıjoronədə qıyməti boho bıe dıminə səbəb həmonə məhsulon istehsali kam bıeye. Əqər kartof ğıt bıbo, çey ğıymət 2mənot ne, lap 5 mənotən bıe bəzıne. Məhsulon ğıyməti erjon karde ro, bə məmləkəti di təsərrufati inkişafi tənəvəc mande, bə fermeron komək karde, bəvon de kamə faizi krediton doe, əvoni de keyfiyyətinə və bolməhsulinə tumi təchiz karde, rışvəxorə məmuron tərəfo çəvon ğarəti vəy se lozime.  Vəziron bə vıjor beşe, de savdıkaronku ğıymət xəbə sey roy ğıyməton saru, vıjoronədə erjoni eğande mumkun nıbə koe. Bımi ro vıjorə iğtisadiyyati sa soron dırozi bərğəror bıə ğanunonış heste. Əliyevi hokuməti məmuronən çok bəbe ki, həmonə ğanunon omuton, bəvon əməl bıkon və əvoni bə Respublika iğtisadi jimoni tətbiğ bıkon. Bəvədə keşvəri vıjoronədə ərzaği ğıyməton həğiğətən saru eğande mumkun bəbe.