Məhərrəmə manq
De Hicri-ğəməri təğvimi 1440-minə sor bə orəx rəse. Hicri tojə 1441-minə sori sıftənə ruj – məhərrəmə manqi 1 bə miladi sentyabrə manqi 1 –minə ruj eqınedə.
“İslamazeri.com” nıvıştedə ki, məhərrəmə manq Hicri-ğəməri sori manqon arədə muğəddəsə manqono qıleye. Çoko ki, Həzrəte Peyğəmbər (s.ə.v.s) fərmayeş doəşe, ım manq sulh və əmniyyətinə, muharibə ğədəğən bıə manqe. Əmo Aşura ruj bə İslami tarix bənə İmom Huseyn (ə) və Əhli-Beyt (ə) tərəfdaron həx və ədaləti roədə bə şəhadət rəsə ruji daxil bıə. Kərbəlo faciə ki, bə mısılmonə umməti ğəlb həm bənə huzn və ğussə, həmən bənə ğurur və iftixarinə məğami daxil bıə. Im faciə nəsilon yodədə mande ro İmom Huseyn (ə) jimon və çey mubarizə bə yod varde yolə əhəmiyyətış heste.
Aşura rij ımsor bə sentyabri 10 təsaduf kardedə. De ım munasibəti ĞMİ bə həmə dindaron dılvandi doəşe və həmdardi izhar kardəşe, bəvon məsləhət zınəşe ki, İmom Huseyn (ə) əzadarəti bə çey sandi layığ, barzə səviyyədə dəvunion.
Məhərrəmə manqi ərəfədə bə Dini təşkilaton dair Devlətə Komitə sədr Mubariz Ğurbanli və Prezidenti Adminstrasiya bə Milləton arə munasibəton, multikulturalizm və dini məsələon dair şebə mudir Etibar Nəcəfovi iştiraki muşavirə dəvuniəşone. Əvon bı tədbirədə iştirak kardəkəson nəzə rosniəşone ki, Məhərrəmə manqi mərasimon bəpe çe devləti ğanunon çərçivədə, bə islamə dini mədəni normaon muvafiğ təşkil kardə bıbo, bə devləti ğanunon və milliə marağon zidd təbliğat bardə nıbo. Hokuməti əlağədarə təşkilaton bəpe bı roədə profilaktik tədbiron bə jiomn dəvunion. Əvon həmən bı taziyə mərasimonədə de Kərbəlo şəhidon bahəm Ğərəboği şəhidonən bə yod varde, bə çəvon ruhi dıvo hande zərurət ğeyd kardəşone. Muşavirə orəxədə bə reqioni şebə mudiron muvafiğ dəstur və dəspardəyon doəşone.
