Pars Today

Oktyabri 16-ədə Prezident İlham Əliyevi de hokuməti uzvon iğtisadi muşavirə dəvunişe. Bənə navonə jıqo tədbiron bı qirdbemonədən məmləkəti iğtisadi inkişafi barədə tarifinə qəpon jeşe. Əmo cəmiyyəti real jimoni bə çey votəyon muvafiğ nıbe bə har kəsi çok məlume. Bi səbəbən beğərəzə təhlilqəron və mass-media həmkaron bə Əliyevi həmonə ehandon ıştə neqativ munasibət izhar kardışone.

Prezidenti həmonə muşavirədə ehandışe ki, Respublika nəğliyyatə infrastruktur dınyoədə 27-minə, Mustəğilə Devləton İbemonə məmləkəton miyonədə 1-minə vırədəy. İğtisadşunas Toğrul Maşallı bə Meydan TV votəşe ki, çe Azərbaycani ıştə “Marketinq Cəmiyyəti” qıley parseş dəvuniəşe, ım nəticə elan kardəşe. Əsil həğiğətədə isə jıqo tədğiğatonədə çe məmləkəti 10 qılə dıjdə şəhəron arədə nəğliyyatə infrastrukturon vəziyyəti təhlil kardedən. Az.R ım kateqoriyadə dınyo məmləkəton arədə 88-minə vırədəy.

Toğrul Maşallı jıqo reytinqi muəyyət kardeədə bə Respublika osınə roon vəziyyəti dair rəğəmon pandomnie ğeyd kardəşe, votəşe ki, bə “Marketinq Cəmiyyəti” elan kardə reytinqi əsasən Az.R ım kateqoriyadə dınyoədə 11-minə vırə qətedə, hətto çe Almaniya və Fransa keşvəronsə navədə şedə. Hərçənd ki, ım məmləkətonədə saatədə de 250 km surəti hərəkət kardə poyizon hestin, Az.R-ədə isə osınə roonədə surət xeyli sarue, xidməti səviyyən dınyo standartonsən dumoədə mandedə.

Tədğiğatkarə jurnalist Xədicə İsmayılən Prezidenti hokuməti daxilədə kali odəmon bə islahati mane bıe barədə votəyon ıştə munasibət jıqo izah kardəşe ki, prezident de ım votəyon cəmiyyətədə jıqo qıley illuziya bə əməl varde pidəşe, quya əv islahat bardedə, əmo bey ım imkani dodənin, muğavimət nişon dodən. Əqər ım həğiğətən jıqoebu, jəqo bıdə əv həmonə odəmon nomi bıvoto, və ya əvoni çe vəzifəku bə kəno bıno. Xədicə İsmayıl`i ımən votəşe ki, Respublikadə  bə xəyali islahaton muğavimət nişon doəkəs heyo Prezident ıştəne. Hokuməti daxilədə bənə rışvəxorəti, korrupsiya və həniən co çanədə çırkinə hərəkəton hestin, bəpe Prezident ıştən bəvon orəx bıdo.