Zərif bə İron və Ermənistoni miyono həmkarion inkişof doe təkidış kardə.

İroni xarıci vəzir de terrorizm mubarizə barde ijən məntəğə əmniyyət və stabiləti təmin kardero, bə İron və Ermənistoni miyono həmkarion təkidış kardə.

İroni xarıci vəzir Muhəmməd Cəvad Zərif Fevrali 1 ədə Tehronədə de Ermənistoni xarıci vəzir Viqen Serkisiyan mıloğatış kardə ijən votışe: de diğğət karde bə məntəğədə terrorizm və radikalizmi xətər və təhdidon, ısət İron və Ermənistoni miyono həmkarion lozim və təbiye.

İroni xarıci vəzir bə İron və Ermənistoni miyono tarixi rabitəon işorəş kardə və əlovəş karde: İroni və Ermənistoni miyono rabitəon qıləy vəziyətdə bə inkişofi tərəf hərəkət kardedə ki, məntəğədə de diniku sui-istifodə karde radikaliyə hərəkəton ziyod bey holədəy.

Zərif İroni prezidenti tojə səfəri bə Erməniston mısbət hisobış kardə və omidvar be ki: İron və Ermənistoni miyono mıştərikə həmkarion məntəğədə sulh və əmniyəti bərğəror bıkə.

Ermənistoni mudafiə vəzir Viqen Serkisiyan həm ım mıloğatdə votış: İron məntəğədə bənə yolə muhimmə rol ifa əkə kişvəre ki de İron həmkarion inkişof doe bo Ermənistoni ro vey muhim heste.

Ermənistoni mudafiə vəzir həm bə Erməniston çı Doktor Ruhani səfəri muhim hisobış kardə və votış: ım səfəri bəpeştə 2 qılə kişvəri miyono çandə tojə həmkarion bino be.

Ermənistoni mudafiə vəzir deştə yolə heyəti və de İroni mudafiə vəziri rəsmi dəvəti bərobər çand ruje ki bə İron omə.