Erməniston bə Azərbaycan Respublika dustiyəti iyən sulhinə meylon mısbətə reaksiya nışo bıdə.
Tırkiyə xarıci vəzir Ermənistoniku tələbış karde ki sulhi bərpo kardey çərçivədə bə Azərbaycan Respublika dustiyəti rəftoron mısbətə reaksiya nışo bıdə.
Bə TRT raporti əsos, Tırkiyə xarıci vəzir Mıvlud Çavuşoğlu tojədən iddioış karde ki Azərbaycan Respublika məntəğədə sulhi bərpo kardeyro cəhd kardedə iyən əmələdə sulhi dumoədəy ki bəpe de Ermənistoni mısbətə reaksiyaon dim bə dim bıbu.
Tırkiyə xarıci vəzir, əlovəş karde: sulhi bə vırə rosniyeyro Boku dıvət bə İrəvoni təklifonış doə ki de Ermənistoni diğğəti bəpe bə ico bıbu, əmmo məvuji Erməniston çı daxıli radikaliston iyən xarıci ermənion təziği dim bə dim bıə.
Vote lozime ki Ğərəboği 44 rujə canqiku bəpeşt tosə bə ısət Erməni iyən Azəri hərbion vey kərə sərhəddədə de yande dave qətəşone.
Miladi 2020 minnə sori Oktiyabrə manqədə Azərbaycan Respublika vey hevuj iyən həmmə tərəfinə əməliyati bo Ğərəboği məntəğəku Ermənion xaric karde və işğal bıə ərazi ozodəti xoto bino kardışone.
Azərbaycan Respublika 44 ruj canqi bəpeşt muvəffəğ bıə təğribən 3500 kilomiter çı Ğərəboği ərazi əcumlə 132 kilomiter çı İroni sərhəd nezi məntəğon ozod bıkə.
