Şəmxani: Cənubi Ğəfğaz məntəğədə, stabilə sulhi icod kardeyro İroni həmkari hozzoəti.

İron İslam Respublika milli əmniyyəti ali şura sərkatib votışe: İron İslam Respublika bənə dəvardəyon hozzoe ki Cənubi Ğəfğaz məntəğədə, ıştə həmmə zərfiyəton və imkanatonku istifodə ko.

Bə İrna raporti əsos, zinə İrəvanədə, İslamiyə inğilobi Yolə Rəhbəri nımoyəndə iyən İron İslam Respublika milli əmniyyəti ali şura sərkatib Əli Şəmxani de Ermənistoni milli əmniyyəti şura sərkatib, Armen Qriqoriyani vindemonədə bə 2 qılə milləti miyono mədəniyət, sivilizasiya iyən torixi cəhəto, nığılə rabitəon işorəş karde iyən votışe: ım şəroyet bois bəbe 2 qılə kişvəri miyono həmmə tərəfiyə rabitəon zumand iyən hevujətiro çokə zəminə icod bıbu.

İron İslam Respublika milli əmniyyəti ali şura sərkatib ijən işorəş karde ki tule tarix iyən məntəğə və beynəlxalğə saxtə şəroyeton həmçınin təbii bevəcə hodisəonədə, İron və Erməniston de yande kənoədə bin, əv ijən votışe: de ım çokə kanəti vıcudi, 2 qılə kişvəri mınosibəton hevujətiro, bəpe məhdudiyəton məhv bıbu.

Şəmxani ijən votışe: holihazırədə İron və Ermənistoni miyono iğtisodi mıbodiləon miğdor de 2 qılə kişvəri zərfiyəton mığobilədə bərobər ni, və bəpe həminə məsələ barədə bə 2 qılə kişvəri həmmə zərfiyəton təkid bıbu.

Ermənistoni milli əmniyyəti şura sərkatib, Armen Qriqoriyan həm İron İslam Respublika milli əmniyyəti ali şura sərkatibi səfəriku bə Erməniston ıştə rizoyəti nışoş do iyən həmmə zəminəonədə bə 2 qılə kişvəri rabitəon zumand iyən bə inkişof rosniye təkidış kardə.

Qriqoriyan bə 2 qılə kişvəri kanə rabitəon işorəş karde iyən votışe: əmniyyət və iğtisodi rabitəon bə inkişof rosniyero İron və Ermənistoni miyono vey yolə zərfiyəton mıvcude ki ım zərfiyəton əktiv kardeyro, veyə cəhdon lozime.

Ermənistoni milli əmniyyəti şura sərkatib, ijən votışe: Cənubi Ğəfğaz kişvəron miyono rabitəon inkişofiro və məntəğə əmniyyəti icod kardeyro, İron İslam Respublika vey muhimmə rolış heste.

Qriqoriyan həmçınin məntəğədə sulh və stabiləti icod kardeyədə, İroni təsir iyən roliku ğədrdonətiş karde iyən həminə royədə və məntğə stabiləti və əmniyyəti zumand kardeyro, İroni roli dəvomi vey zərori zınəş be.

İslamiyə inğilobi Yolə Rəhbəri nımoyəndə iyən İron İslam Respublika milli əmniyyəti ali şura sərkatib Əli Şəmxani qıləy 2 rujə rəsmi səfəri əncom doeyro zinə sıb bə Ermənistoni paytəxt İrəvan varid bıə be.