Azərbaycan Respublika bə təhrikəkə hərəkəton mıttəhəm bıə.

Ermənistoni Xarıci vəzir Boku dıvləti bə təhdidomiz iyən təhrikəkə hərəkəton mıttəhəmış karde.

Çand daon bəbe ki, Erməniston iyən Azərbaycan Respublika daveon bə Ğərəboği məntəğə xotoe,  və har 2 qılə kişvər iddio kardedən ki ım məntəğə bəştə sərzəmin məxsuse. Dəvardə sorədə iyən qıləy 6 haftə canqi mıddətədə, Buko muvəffəğ bıə be, de Rusiyə vositəçiyəti iyən otəşbasti imzo bey bənav, ım məntəğəku kali baxşon soyb bıbu.

Isət, Nikol Paşiniyan bə sulh təvafuğnomə muvafiğə kardey  xoto, Erməniston kişvəri daxılədə de şiddətinə reaksiya dim bə dim bıə.

Bə Pan Armeniyan aqentiyəti raporti əsos, Ermənistoni xarıci koon vəzir, Ararat Mirzoyan, votışe: qıləy holədə ki Erməniston, Ğərəboği daveon həlliro iyən məntəğədə stabil iyən sulh icod kardeyro vey cəhd kardedə, Azərbaycan Respublika bəştə təhrikəkə siyasət iyən zumandəti  idomə do.

Ermənistoni xarıci koon vəzir idoməş do: hali hazırədə ki dınyo bə Ukrayna diğğət kardey holədəy, Azərbaycan Respublika har ləzzə pidəşe ki məntəğədə qıləy təhrikəkə hərəkət əncom bıdə.

Çən beynəlxalğə ictimaro, vey muhimme ki Cənubi Ğəfğazədə be stabiləti şəroyeton icod beyku vəy bıqəto iyən həminə cəhətədə təsirinə ğədəmon peqəto.

Çımiku bənav həm Azərbaycan Respublika prezident, İlham Əliyev,  Ermənistoni mıttəhəmış kardə be ki bə sulh təvafuğnomə rəseyədə bəhonə icod kardedə iyən votışe: ım kişvər bəştə ğanuniyə təəhudon əməl kardə ni, ta osınə reys xətton təsisiro bə tyein bıə məntəğon bırəsi.