Bə Azərbaycan Respublika ələyh Ermənistoni ittihom

Ermənistoni xarıci vəzir, Azərbaycan Respublika kişvərış bə Ğərəboği məntəğə sulh iyən stabiləti zidd hərəkəton mıttəhəmış kardə.

Miladi 2020 minnə sorədə Ğərəboği 44 rujə canqədə Azərbaycan Respublikaku, Tırkiyə siyasi və hərbi hevujə himoyə dumoədə, Ankara iyən İrəvani rabitəon kəm bıə.

3 tərəfiyə bəyoniyə nomo bıə otəşbast təvafuğnomə bəpeşt ki de Rusiyə vositəçiyəti əncom be,  Buko, İrəvan və Ankara ıştə rabitəon de yande normal kardışone əmmo koşınason həm bənə ım 3 qılə kişvəron rəsmi şəxson, ım rabitəon rə çok bey, çok zınəşon ni.

Im təvafuğnomədə ğəror bıə Ğərəboği məntəğə baxşonku qıləyni əcumlə Şoşa şəhr bə Azərbaycan Respublika oqardo.

Əqəçı Moskvaədə Erməniston və Azərbaycan Respublika prezidenton miyono otəşbasti imzo bıə əmmo tosə bə ısət 2 qılə hamsuyə kişvəron miyono sulh iyən stabilə şəroyet bə vırə rəsəş ni.

Bə zinə ruji, Ermənistoni umumi rədio raporti əsos, Ermənistoni xarıci vəzir, Ararat Mirzoyan votışe: de ım vıcud ki Ğərəboği məntəğədə sulh iyən stabiləti icod kardeyro, Ermənistoni tərəfo vey cəhdon əncom bey holədəy, əmmo həmçınan de Azərbaycan Respublika rəsmi şəxson canqtələbə sıxanon dim bə dimimon, həmonə sıxənon ki çəvon hədəf məntəğə stabiləti və sulhi məhv kardeye.

Ararat Mirzoyan ijən əlovəş do: əlovə bə ım, Azərbaycan Respublika beynəlxalğə humanistə prinsipon rioyət nıkardəşe, və həmçınan Erməni ğeyre hərbion və canqi əsiron qirov qətəşe və çəvonku bənə əbzori istifodə kardedə.