Boku iyən İrəvan əhd bastəşone ki bə sulhi rəseyro ıştə cəhdon əlovəkon.

Avropa şura rəis xəbəş do ki Azərbaycan Respublika iyən Erməniston əhd dəbastışone ki bə sulhi rəseyro ıştə cəhdon əlovə kon.

Miladi 2020 minnə sori Sentiyabrə manqi 27 minnə sorədə, Ğərəboği məntəğədə Azərbaycon Respublika ərtış ıştə işğal bıə ərazi ozod kardeyro, qıləy əməliyot binoş kardə be, həminə 44 rujə canq iyən daveon bəpeşt, Azərbaycon Respublika iyən Erməniston de yande otəşbasti təvafuğnomə imzoşon kardə ki bəvədə proqonoz bıə be Boku, işğal bıə məntəğəon kontrol, ıştə ixtiyorədə ğəror bıqəto.

Bə İRİB raporti əsos, Brusselədə Azərbaycon Respublika prezident, İlham Əliyev və Ermənistoni iminnə vəzir Nikol Paşiniyani miyono votımonon 4 minnə mərhələ oxoədə, Avropa şura rəis Şarl Mişel, Ğəfğaz cənubədə oxonə təhəvulaton iyən de ım 2 qılə kişvəri Avropa ittifoği rabitəon barədə elanış karde: 3tərəfiyə iclosi oxo bəpeşt, 2 qılə kişvər bə çəşəçiyə inkişofon dast peydo kardeşone iyən bə ğərol omin ki bə qıləy sulh təvafuğ rəseyro, ıştə cəhdon çand bərobər bıkon.

Mişel iyən təsdiğış karde: oxonə iclosi mıddətədə təvafuğon bə inkişof rəseyro veyə hərəkəton iyən cəhdon əncom bıə və ım çok iyən mısbətə nışonəy. 2 qılə kişvəri vəzironku tələb kardımone ki 1 manqi mıddətədə və sulh təvafuğnomə nanıvışteyro de yande vindemon bıkon.

Avropa şura rəis ijən votışe: bəşərdustanə məsələon barədə əcumlə minaon peqətey, zindon bıə kəson məsələ və qim bıə şəxson sərnıvışti barədə votımonon əncom bıə və ım məsələ vey muhimme ki Bokuədə bıə, Erməni əsiron ozod bıbun.

Şarl ijən təsdiğış karde: Noyabrə manqədə və Brusselədə, 2 qılə kişvəri marziyə kumitəon vəoməy iclos bərpo bəbe. Əv ijən əlovəş karde: Noyabrə manqi oxoədə həm 3tərəfiyə iclos əncom bəbe və Avropa ittifoğ hozzoe ki bə ım iclosi tərəfon əlovə bıkoy.