Məntəğə siyasi coğrafiyaədə, harcurnə əvəzon vəy qəte bəbe.
Niyu-Yorkədə İron İslam Respublika prezident, Ermənistoni iminnə vəziri vindemonədə votışe: İron İslam Respublika təkidışe ki məntəğə siyasi coqrafiyaədə, harcurnə əvəzon vəy bəpe qətə bıbu.
Bə İrna raporti əsos, zinə, və İron İslam Respublika prezident, Ayətullah Rəisi Niyu-Yorkədə ıştə səfəri 4 minnə ruji cərəyonədə, de Ermənistoni iminnə vəzir, Nikol Paşiniyani vindemonış karde iyən votışe: İron İslam Respublika bə 2tərəfi iyən beynəlxalğə marzon oqətey, kişvəron hakımiyəti həxi ehtırom noey iyən siyasi coqrafiyaədə harcurnə əvəzon vəy qətey təkid kardedə.
Ayətullah Rəisi ijən Erməniston və Azərbaycan Respublika miyono muşkilaton hələkəroy, muzakirə və votımon bəyon və əlovəş karde: həmçınan ki Şanxay iclosədə təkid kardemone, məntəğə co qılə canqi tov vardey əzı ni.
İroni prezident, Erməniston və İroni mıştərəkə marzon, torixi marzon bə hisobış varde və votışe: siyasi və iğtisodi həmkoətion bə inkişof rosniyero bəpe ım muhimm iyən stratejikə marzon oqətə bıbun.
Im vindemonədə Ermənistoni iminnə vəzir, Paşiniyan həm votışe: əmə çəmə həmmə sərzəmin iyən əraziku mıhofizə kardedəmon, və har qılə xəbisə plan ki İron və Ermənistoni co karde hədəfış bıbu çəy vədə muğavimət kardedəmon.
Paşiniyan həmçınin Ermənistoni ərazi təmamiyyəti oqətey barədə, İroni ruşin iyən ğoymə nəzəonku ğədrdonətiş kardə.
İron İslam Respublika prezident ki Dışəmbə zuhrə vaxti, İ Bıə Milləton Təşkilati 77 minnə umumi iclosədə iştirokiro, deştə ali heyəti bə ico bə Niyu-York səfərış kardə be, tosə bə ısət, de Fransə, İsveç, Boliviya, Fənlandi prezidenton və Pakiston, Livan, İrağ, Yaponiya iminnə vəziron və Avropa şura rəisi muxtəlifə məsələon barədə vindemon iyən votımonış karde.
