Azərbaycan Respublika mədəniyət vəzir: de İron mədəniyəti rabitəon bə inkişof rosniyero hozzomon.
Azərbaycan Respublika mədəniyət vəzir de İron İslam Respublika mədəniyət iyən irşodi vəziri mədəni koon muavin vindemonədə 2 qılə kişvəri mədəni rabitəon bə inkişof rosniye iyən nığılətiro ım kişvəri hozzoətiku xəbəş do.
De Boku kitob beynəlxalğə 8 minnə nımoyeşqoh iminnə ruji həmzəman, İroni İslami irşod iyət mədəniyət vəziri mədəni koon muavin Yasır Əhmədvənd, de Azərbaycan Respublika mədəniyəti vəzir, Anar Kərimov vindemon iyən votımonış karde.
Mehr manqi 13 minnə rujiku, Boku kitob beynəlxalğə 8 minnə nımoyeşqoh, bino bıə və tosə Hicri Şəmsi 1401 minnə sori Mehr manqi 17 minnə ruj dəvom peydo bəkay.
İroni kitob iyən ədəbiyoti kə, de Boku kitobi beynəlxalğə 8minnə nımoyeşqohədə iştiroki, əğıl iyən nocıvon, dastan, şer, İron şınosi, hınə və turizm baxşonədə, 300 onvaniku vey, çokə kitobon həminə nımoyeşqohədə elan kardedə.
Bə İroni kitob iyən ədəbiyoti kə raporti əsos, İroni mədəniyət vəziri mədəni koon muavin Yasır Əhmədvənd, ki bə Azərbaycan Respublika dıvləti rəsmiyə dəvəti əsos, ım kişvərədə iştirok peydoş kardə, əlovə bə Boku kitobi beynəlxalğə 8 minnə nımoyeşqoh, de Azərbaycan Respublika mədəniyəti vəzir həm vindemon iyən votımonış karde.
Im vindemonədə Azərbaycan Respublikaədə bıə İroni mədəni mışovir Ğorbanəli Purmərcan həm iştirokış be.
Həminə vindemonədə, Yasır Əhmədvənd votışe: İron İslam Respublika deştə həmmə imkanaton iyən zumandəti vositə, 2 qılə kişvəri miyono mədəniyət həmkoətion hevujətiro cəhd kardedə boçiki İron etığadış heste mədəni rabitəon bois bəbe 2 qılə kişvəri rabitəon de yande vey nez bıbu, ijən iğtisodi və siyasi co rabitəon həm zumand iyən hevuj kardedə.
Vindemoni oxoədə, Əhmədvənd mədəniyəti muxtəlifə baxşonədə bə Azərbaycan Respublika iyən İroni miyono 2 tərəfiyə həmkoətion iyən rabitəon dəvomi təkidış karde.
Azərbaycan Respublika mədəniyəti vəzir, Anar Kərimov həm votışe: İron və Azərbaycan Respublika mədəni cəhəto nığılə əloğəon soybin, və Boku kitobi nımoyeşqoh ım həmkarion nışonəonku qıləyni bə hihisob omeydə. əmə hozzomon ki həmmə baxşonədə ım rabitəon bə inkişof bırosnəmon.
