Bə Azərbayan Respublika tələbi, Ermənistoni mənfiyə cəvob.
Azərbayan Respublika prezident İlham Əliyev xəbəş do ki Ermənistoni iminnə vəzir, Nikol Paşiniyan, Ermənistonədə bə rabitə caddə soxtey tələbi, mənfiyə cəvobış doə.
Ğərəboği sulh təvafuğnomə imzo bey bəpeşt, Azərbayan Respublika prezident, İrəvani dıvlətiku tələbış kardə ki Ermənistoni Siyonik cənubi ostaniku, bə Nəxcəvani mıstəğilə respublika səmti qıləy koridor doə bıbu. İlham Əliyev ım koridori, Zənqzor nomış noə, əmmo Ermənistoni dıvlət bə Azərbayan Respublika ın koridori doey muxalifətış kardə.
Ermənistoni rəsmi şəxson təkidışon kardə ki çımiku bənav Tırkiyə dıvlət həm Ermənistoniku bənə həminə mıvzo tələbış kardə be, ki mənfiyə cəvobi məsəşe.
Bə Azərtac raporti əsos, Praqaədə Avropa ittifoği iclosəsədə İlham Əliyevi iştiroki bəpeşt, əv de Azərbayan Respublika televeziya kanalon mısohibədə, votışe: tojədən Ermənistoni iminnə vəziriku Siyonik cənubi ostaniku, bə Nəxcəvani mıstəğilə respublika tərəfi maşinə roy dutey tələbım karde əmmo Paşiniyani tərəfo mısbətə cəvob bəyon nıbe.
Azərbayan Respublika prezident, İlham Əliyav, Ermənistoni iminnə vəzir Nikol Paşiniyani bə muğavilon darşiye mıttəhəmış karde iyən votışe: həminə məsələ barədə ıştəniku səbr iyən təmkin nışo dodəmon.
Eyne holədə İlham Əliyev təkidış karde: vəomey iclosonədə, xususi 2 qılə kişvəri miyono marzi delimitasiya təyin kardey komissiya iclosonədə, əmə bəştə tələbon isror bəkamon.
