Marzi ixtilofon həlliro, İrəvani bə Boku doə təklifon.

Ermənistoni iminnə vəzir, bə Azərbaycan Respublika təklifış doə ki delimitasiya təyin kardey komissiya iclos bərpo bıbu.

Miladi 2020 minnə sor və 44 rujə canqi bəpeşt, co kərə Azərbaycan Respublika iyən Ermənistoni marzi hərbion de yande daveon binoşon kardə, peşo har kişvər co tərəfi mıttəhəmış kardə ki otəşbasti rioyətış nıkardə ijən daveon dəvomış peydo kardə.

Bə Armen Peres aqentiyəti raporti əsos, tojədən Ermənistoni iminnə vəzir, Nikol Paşiniyan qıləy tvitter mesaji ğolibədə, bə  Azərbaycan Respublika təklifış doə ki marzi əmniyyət və delimitasiya təyin kardey komissiya icloson əncom bıbu.

Im mesajədə omə: marzi əmniyyət və delimitasiya təyin kardey komissiya icloson qırdbemoni bərpo beyro,  Erməniston bə Azərbaycan Respublika qıləy zəmoni təklifış doə.

Həminə mesaji dəvomədə Paşiniyan Oktiyabrə manqi 13 minnə ruj Bruksselədə 2 qılə kişvəri nımoyəndəon iclosi bərpo bey tələbış karde.

İşorə kəmon ki səvet hukumətiku co bıə kişvəron miyono delimitasiya təyin nıbey çın kişvəron miyono deveon icod beyri, vey muhimmə amil bə hisob omeydə.

Dəvaerdə manqədə Azərbaycan Respublika iyən Ermənistoni hərbiçion miyono  marzi daveon 200 nəfəriku vey tələfoti bois bıə və ım kərə həm bənə həmişə, har kişvər co kişvəri çı devaon binoəkə zıneydə.