Bə Azərbaycan Respublika ələyh Ermənistoni tojə jıə ittihamon.

Nikol Paşiniyan, Azərbaycan Respublika kişvəri mıttəhəmış karde ki de bəhonə icod kardey bə Ermənistoni həmlə kardə.

Miladi 2020 minnə sor və 44 rujə canqi bəpeşt, nəhayətədə de Rusiyə vositəçiyəti 2 qılə kişvəri miyono otəşbasti təvafuğnomə imzo bıə və daveon sə bıə. əmmo marzi məntəğəonədə Erməniston iyən Azərbaycan Respublika miyono həmçınan daveon əncom bəbe, Ermənistoni sərzəminədə Azəri hərbiçion həmləon çand kərə de Rusiyə sulh mərominə ğıvvon be nəticə mandə. de ım vucud ki Boku iyən İrəvani rabitəon normal kardey prosses bino bıə, əmmo Azərbaycan Respublika iyən Ermənistoni miyono daveon həmçınan dəvomış heste və 2 qılə kişvəi yolon har çand kərə bə co tərəfi ələyh ittihamoni bəyonışon kardedən.

Bə Armen Peres aqentiyəti tojə raporti əsos, Ermənistoni iminnə vəzir, Nikol Paşiniyan ıştə Tvitter mesajədə nıvıştəşe: Boku daimın otəşbasti darşiye və muğavilədə ğeyd bıə təhhudon darşiye bə İrəvan rəbt dodə ta bə Ermənistoni əleyh tojə hərbi təcavuziro bəhonəş bıbu.

Ermənistoni iminnə vəzir marzon əmniyyəti qarantiya iyən otəşbasti oqəteyro, bə beynəlxalğə strukturon icod bey zərrurəti təkidış karde.

Paşiniyan həmzəman co qılə Tvitterədə həm elanış karde ki bə Boku təklif doəmone ki Erməniston-Azərbaycan Respublika mıştərəkə marzədə təftiş poston icodkon əmmo de təklifiku çand manq dəvardey vucudi tosə bə ısət, Azəri rəsmi şəxson bə ın təklif cəvobış doə ni.

Jiğo votey bıdə ki Ğərəboği canqədə və Azərbaycan Respublika mənafe çərçivədə, Ermənistoni kali baxşon bə Azərbaycan Respublika doə bəy.