Sloveniya, Norveç, Livan, Tırkiyə və Yunanıstanədə Nəvuzə idi mərasimon .
De İroni səfarətxanəon zəhməti Nəvuzə idi iyən bəharə fəsli məxsusə mərasimon dınyo bəzi kişvəronədə bərpo be.
Bə İrana raporti əsos Esloveniya paytəxt Lobliyanaədə İroni səfarətxanədə məxsusə bərnoməonədə iştirok əkəyon farsi zıvoni şıron məsə kənoədə bəhar və təbiəti barədə qıləy filmi təmoşo kardən.
Esloveniyadə İroni səfir Morteza Raməndi ım mərasimədə Nəvuzə idi təbrik karde kənoədə doardə 3 sori mıddətədə 2 qılə kişvəri miyono bə ticarət miğdori 3 bərobər bey işorəş kardə.
Bənə jıqonə mərosim Noroşi paytəxt Osloədə de İronıjon və səfarətxanəku əkəyon iştiroki bərpo be.
Norveçədə İroni səfir Muhəmməd Həsən Həbibollah zode Nəvuzə idi təbrik karde.
Bəpeştə bə İron və Norveçi miyono mıvcudə zərfiyəton işorəş kardə iyən bo əloğəon inkişofiro iğtisodi, elmi və mədəni həmkarion əhəmmiyəti barədə votışe.
Nəvuzə idi məxsusə bərnoməon Livanədə həm de İroni mədəniyə mışoveri zəhmət iyən İronıjon huzuri Beyrutədə bərpo be.
İstanbulədə həm İroni sərkonsul, Nəvuzə idi çı İroni milli şəxsiyəti simvolonku zınəş be iyən votışe: Nəvuzə idi mərasimon vey hevuje və çı sulh iyən dusbətiyəti simvole.
Bə İrna raporti əsos İstanbuli Aydin Unioversetədə bıə məxsusə mərasimədə əlovəş kardə: muxtəlifə mədəniyə sahəon əcumlə Nəvuzə idi barədə İron və Tırkiyə miyono əloğəon inkişof vey muhimme.
Çı Aydin elmiyə mərkəzi sədr mıstəfu Aydin həm mərasimədə ım idi təbrik karde bəpeştə votışe: məntəğədə 2 qılə yol iyən tarix ə soxtə kişvər yəni İron və Tırkiyə muxtəlifə sahəon xususi elmi baxşonədə vey istifodə kardə ninə zərfiyəton xıvandin.
İroni ğədimi musiğion icra karde həm çı Yonanıstani Lefkada şəhri mədəniyə mərkəzədə de İronıjon, mədəni rəsmi şəxson iyən İroni hınə və musiği piyə kəson iştiroki bərpo be.
Im mərasimədə 2 qılə kişvəri rəsmi şəxson bə İron və Yonanıstani miyono mədəni əloğəon iyən mıştərəkə noğtəon işorə kardən.
Nəvuzə id 12 qılə kişvəronədə rəsmi surət zınə bıdə iyən İron, Əfğanıstan, Tacikıstan, Azərbaycan Respublika, Ozbəkıstan, Tırkəmenıstan, Ğəzaxıstan, Ğırğizıstan və Alpaniyaədə təğvimədə tətilə ruj ğeyd bıə.
