Tehroni cumə nımoji xətib: İroni millət 40 sore ki sultə nizomi vədə de zumandəti səpoysə mandəy.
Tehroni cumə nımoji xətib ətomiyə təvafuği bəyəndı jey barədə çı Amerikə prezident Donald Trampi cəhdon reaksiyaədə təsdiğış kardə: İroni milləti 40 sore ki sultə nizomi vədə əcumlə Amerkə muğabilədə de zumandəti səpoysə mandəy.
Bə İrib muxbıri raporti əsos, Huccətul İslam Vəlmuslemin Seyd Muhəmməd Həsən Əbuturabifərd Tehronədə cumə nımoji ım haftə xutbəon, işorəş kardə: dəvardə 40 sori mıddətədə sultə nizom de muxtəlifə roon əcumlə məcburiyə canq, sanksiyaon və siyasi təziğon bə İron zərbə jey fikədə be əmma muvəffəğ nıbe.
Tehroni cumə nımoji xətib əlovəş kardə: deşmənçiyə rəftoton və Amerkə bədəhdətion muxtəlifə zəminəonədə əcumlə ətomiyə təvafuği barədə bois bıə ki İroni millət və rəsmi şəxson bə ım nəticə berəson ki İron lozime ıştə xanbozonış etibo kardəninə kişvəronku bıvıjno.
Huccətul İslam Vəlmuslemin Seyd Muhəmməd Həsən Əbuturabifərd təsdiğış kardə ki İroni milləti hiç faxt bə sultə nizomi peşt bastəş ni və nibəbaste.
İroni və 5+1 qrupi(Britaniya, Fransə, Rusiyə, Çin, Amerkə və Almaniya) miyono ətomiyə təvafuğ 2016-nə sori Yanvariku bə vırə rosniyə bəy əmma Amerkə dıvlət ki ım muğavilədə i qılə uzve həmişə ətomiyə təvafuği icra kardeədə bədəhdətiş kardə.
Amerkə prezident "Donald Tramp" həmişə bə ətomiyə təvafuğədə bıə co tərəfon nəzəri əks, İroni ətomiyə muğaviləş dəhşətinə təvafuğ zınəş be və tələb kardə ki ım təvafuğ botil bıbu.
Dınyo de Amerkə prezidenti ım deşmənçiyə hərəkət muxalifətış kardə.
