İroni islamiyə inğilabi təsis əkə Mərhum İmom Xomeyni(r) bəfot karde sorqardımon.
Imruj Xordadə manqi 14, Rəmazanə manqi 19 və İyoni 4 minə ruje, bə təğvimi əsos ımruj de İroni islamiyə inğilabi təsis əkə Mərhum İmom Xomeyni(r) bəfot karde sorqardışi bərobəre.
28 sor çımiku bə nav bənə jıqonə rujonədə, İroni islamiyə inğilabi Yolə Rəhbər Ruhollah Musəvi Xomeyni(r) 87 sor zəhmətin iyən fəxrinə jimoni bəpeştə ki hiç faxt çı Həzrəti oqıniye boiys nıbe bəfot kardə və bə həxi mıloğat karde əbədiyə səfər şe.
İmom Xomeyni(r) ıştə mubarizəon hecri şəmsi 1342 minə soriku binoş kardə və de İroni Şah rejimi zulm iyən Amerkə mıdoxiləon muxalifət karde xoto seftə bə Tırkiyə və peşo bə İrağ dər be dər iyən ixric be(yəni şah rejim ə Həzrəti məcburi surətədə bə ım 2qılə kişvər vığandışe).
İmom Xomeyni(r) İrağədə 13 sor jimon karde mıddətdə çandə şaqirdonışon tərbiyə karde kənoədə Şah rejimi fəsodinə mahiyyəti oşkoş kardə və həmişə çı Amerkə ğeyri ğanuniyə mıdoxiləon və milləti həxon ğarət karde barədə deştə elaniyəon və ruşin əkə nıtğon cəmaəti oğo əki ijən qədə-qədə bo islamiyə inğilabi bə səbarzəti rəsero zəminəon hozzoş kardə.
Oxoy sə İroni milləti mubarizəon şiddətin bey və İmom Xomeyni(r) bə Fransə hicrət karde bəpeştə ə Həzrət de əzəmətinə fəxr hecri şəmsi 1357 minə sorədə bə İron oqardə və İroni islamiyə inğilabi bə sabarzəti rəse cərəyonədə ıştə hidoyət əkə və rol ifo əkə təsiron komil kardə.
İroni islamiyə inğilabi bə səbarzəti rəse bəpeştə qıləy holədə ki İroni inğilabi daxıli və xarıciyə deşmənon bevəcə planon əcumlə Səddam rejimi icburiyə canq bino bıə be əmmo İmom Xomeyni(r) ujnən deştə tədbir və şucaət İroni milləti hidoyətış kardə.
Bə həminə mınosibəti xoto ımruj əsrə vaxti qıləy yolə mərasim Tehronəədə bıə İmom Xomeyni(r) pokə hərəmədə de cəmaəti hərorətinə ıştiroki bərpo bəbe.
İroni Yolə Rəhbər Həzrəte Ayətullah Xamenei ımrujnə mərosimədə sohbət iyən nıtğ bəkay.
