İnğilabi yolə rəhbər:atom enerji təşkilat təciliyə holətədə bə 190 həzo SWU (izotop co karde ğabiliyəti) hozzı kardeyu ıştə koon bino kon.
İslami İnğilabi yolə rəhbəri zinə əsrə vaxti ironi islamiyə cumhuriyəti yolə təsis əkə həzrət imom Xomeyni bə rəhmət şe 29 nə sorəqardışi mərasimədə ironi atom enerji təşkilatiku piyəşe bə atom sazışi əsosi bə 190 həzo SWU rəseyu təciliyə holətədə nav şərayeton iyən lozim bə hozzıətion təşkil bıkən.
Bə yolə rəhbəri dəftərxonə məlumat ərosnə mərkəzi elanon əsosi Həzrət Ayətullah Xamenei votışe: bəzi avropaiyə devləton qəponku jıqo məlume ki intizarışon heste ironi millət həm sanqsiyaon ğəbul bıkən və həm ıştə atom fəaliyətonku ki məmləkəti omə rujon ğətiyə ehtiyoce dast bıkəşon və ım məhdodiyəton dəvom bıdən əmmo əvon bıznon ki çəvon ım pərişonə han təbir nibəbe.
İslami İnğilabi yolə rəhbəri rəket məsələ barədə həm işarəş karde rəketiyə ğıvvə zumandəti nuktəonədəy və məmləkəti əmniyəti nav şərayeti təşkil kardə və ıştə bəyonoton dəvomədə əlavəş karde bə ironi zid təşkil bə canqi devranədə mıdofiyə silah iyən rəket ğıvvə nıbe xoto sərhədiyə şəhronku qətə desbə Tehron şəv-ruj rəketiyə otəşon jiyədə be əmmo ısət de həmonə cıvonə alimony əmə məntəğədə 1 minnə rəketiyə ğıvvə bəmon və deşmen zındəy ki əqər ilə rəket bıjəno de 10 qılə rəket cəvob bədomon.
İslami İnğilabi yolə rəhbər işarəş karde deşmenon de qıləy pisixiyə əməliyat çəmə ım zumandə nuktə piyo dastış noə və əlavəş karde əvon fəaliyət kardən ta de pisixiyə canq əmə ıştə zumandətion iyən milliyə iğtidari məsəlonku dast bıkəşəmon ta əcnəbion ve rohət çəmə məmləkət və milləti tale bəştə dast bıqəton əmmo ironi millət ım hərəkəti vədə mandəy.
Həzrət ayətullah Xamenei beynəlxalğə səviyədə ədoləti tələb karde və zılm vində millətonku himoyə kardeş islamiyə cumhuriyəti coqlə zumandə ğıvvəş zınə və votışe: qıləy holədə ki sionist rejimi vədə Fələstin və muğavimət ğıvvonku himoyə karde və məntəğə məmləkəton ərazi təmamiyət iyən istiğlaliku mıdofiyə bə islamiyə cumhuriyəti abro bois bedə deşmen fəaliyət kardə ta çəyku bənə məntəğə daxiliyə koonədə ironi bə arə dəşe nomo yod kardeədə qıləy problem icod əkə məsələ bino bıkə.
İslamiyə inğilabi yolə rəhbər meydonədə cəmaəti huzurış ve muhim zınə və həminə haftə cumə ruji bə ğudsı beynəlxalğə ruji mərasimi işarəş karde və ıştə bəyonoton dəvomədə əlavəş karde de Xıdavəndə xalıği yoliyəti və cəmaəti hərarətinə huzuri bərəkət ımsornə sori ğudsı beynəlxalğə ruj dəvardə soronsə zumand iyən əzəmətin bərpo bəbe.
