Pars Today

Rusiyadə futbolə dınyoə musabiğat dəvardedə. 32 qılə komandon arədə İİR miliıə komandan heste. İroni futbolə komanda bənə Asiya zumandə komandonədə qıley 5-minə kərəy ki, çe dınyo ım barzə musabiğatədə de ləyoğəti ıştə devləti və çey xalqi təmsil kardedə.

Isət İroni futbolkaron 2 qılə hənək dəvuniəşone. Bı hənəkonədə bə dınyo futboli muasirə səviyyə layığ ustoəti numayiş kardəşone. De İspaniya komanda keşədə bə ım curə layığinə hənəki qorə Ali Rəhbər Ayətullah Seyid Əli Xamenei əvon tarif kardəşe, votəşe ki, " şımə hənək əla bıe, Xıdo bəşmə ğıvvət bıdo".

Komanda hənəkon bə İİR Prezident Həsən Ruhaniən diğğəti səbəb bedə. "Nur-az.com" sayt xəbə dodə ki, ey bə İroni de Mərakeşi hənəki kədə çayə sufrə ətrofədə təmoşo kardəşe. Sosial şəbəkondə de ğələbə munasibəti İroni komanda uzvon təbrik kardəşe, votəşe ki, "şımə ım ğələbə həmə İroni xalq şo kardışe, az bəşmə təşəkkur kardedəm".

İroni komanda 2014-minə soriən dınyo çempionatədə iştirakış hestbe. Çey Rusiya çempionatədə kardə hənəkon nişon dodə ki, bə dəvardə musabiğati nisbətədə İroni komanda xeyli inkişaf kardəşe, hənəkkaron ustoəti və məharət xeyli ziyod bıə. Ey bə çempionati peşonə mərhələ ovaşte şans oqətəşe. Bımi ro iyuni 25 -ədə bə Portuğaliya ğalib omənine. Bəvədə İroni milliə futbolə komanda ıştə futboli tarixədə iminə kərə "pley-of" mərhələdə iştirak bəkarde.