Pars Today

İroni İslamiyə İnğilobi Yolə Rəhbər təkid kardeşone: İroni dıvlət əqə lozimə cəhdon əncom bıdə, karde bəzne ki bə mışkolon ğələbə bıkə və Amerkə sui-ğəsdon iyən dışmənə planon vədə səbarz bıbu.

İroni İslamiyə İnğilobi Yolə Rəhbər Həzrəte Ayətullah Xamenei zinə sıbi(yekşambə) çı İroni prezident və dıvlət heyəti uzvon dəvət kardeşone iyən həminə iclosədə, Avropaədə İroni prezidenti bəyon bıə nəzəri ğudrətin vəsf və əlovəş karde: xarıcion vədə məxsusən Amerkə muğabilədə ğudrəti nışo doe lozime və ım hərəkət bəpe çəy vaxtədə, ojə-oşko, iyən de ğudrəti əncom bıbu.

Həzrəte Ayətullah Xamenei de təkid bə ım mıvzo ki koon ciddi iyən de kişvəri ğudrət və imkonatonku komilə istifodə bəpe əncom bıbu əlovəş karde: ətomiyə sazışi barədə Avropa tərəfon bəpe lozimə təzminot iyən qarantiyəon bıdən əmmo kişvəri iğtisod bə ım mıvzo vabəstə iyən mətəl nıbu.

İroni İslamiyə İnğilobi Yolə Rəhbər ijən bə xarıciyə rabitəon və diplomatiyə əloğəon rujbəruj zumandə karde zəroriyyat işarə və əlovəş karde: sıvoy çand qılə məhdudə tərəfon barədə bənə Amerkə, İroni rabitə de şərğ və ğərb bəpe rə de zumandəti dəvom peydo bıkə iyən diplomatiyə sahədə əməliyotiyə məğsədış bıə hərəkəton bəpe ziyod bıbu.

Əvon ijən stabilə iğtisodiyə ro plani bo kişvər bənə lozim ko zınəş be və əlovə kardeşone: əqə iğtisodiyə ro plan hozzı bıbu odəmon və iğtisodiyə fəalon ıştə tale vəziyətiku çok oğo bəben və de stabi iyən oromə hissi bə dıvlət komək bəkan.