Pars Today

İslami inğilabi yolə rəhbər zinə sıb Yaponiya 1 minnə vəzir və dəy həmro bə heyəti vindımonədə votışe: İron İslam Respublika bə Amerkə heç qılə etımodış ni və de Amerkə nakonə muzakiron telə təcrubə ki atom sazışi unvanədə təşkil bə heç qılə şərayetədə təkrar nibəbe çun ki heç qılə azadə və əğlımandə millət təziği jiyədə muzakirə ğəbul nibəkay.

Im vindımoni əvvələdə Yaponiya 1 minnə vəzir Abe Şinzo bə yolə rəhbəri həzrət ayətullah Xamenei votışe:az ğəsdım heste Amerkə prezdenti mesaji bə şımə bırosnom.

İslami inğilabi yolə rəhbəri bə Yaponiya 1 minnə vəziri votışe:əmə,şımə çokə niyyəton və ciddi beədə şək şubhəmon ni əmmo,ə çion barədə ki Amerkə prezdenti həxədə nəğlın karde,Az Trampı heç qılə mesaji ovıştıne ləyoğətdə zındə nim və bəy heç qılə cəvobım ni və çimi bəpeşt həm heç qılə cəvob nibədom.

Həzrət Ayətullah Xamenei bə Yaponiya 1 minnə vəziri qəpon işarəş karde ki Tramp votəşe"Amerkə İroni rejimi əvəz karde ğəsdış ni " və əlavəş karde çəmə problem de Amerkəvıjon rejimi əvəz karde məsələ ni çunki əqər əvon jıqonə ğəsdışon həm bıbo çəy əncom doe ğıvvəşon ni jəqo ki Amerkə nakonə prezdenton dəvardə 40 sorədə İron İslam Respublika nabod kardeyu cəhdışon karde əmmo nıznəşone.

Yolə rəhbəri bə Yaponiya 1 minnə vəziri qəpon co baxş ki qoya Amerkə pidəşe İroni tərəfo atom silah soxte vəy bıqəto işarəş karde və votışe:əmə atom silahədə muxalifimon və çıman şəriyə fitva atom silah soxteyu hərome .əmmo  ımi həm bıznən ki əqər əmə atom silah soxte ğəsdımon əbi Amerkə heç koy nəzni karde və Amerkə icazə nıdoe heç qılə mane icod nəki.

İslami inğilabi yolə rəhbəri atom sazışi çərçivədə de Amerkəvıjon bə muzakirə işarəş karde və votışe:atom sazışi bəpeştə 1 minnə kəs ki dərhal atom sazışış ləğv karde şəxsən Obama be həmonə kəsi ki de İron muzakirə kardeş tələb karde və vositəş həm vığande.

Həzrət Ayətullah Xamenei bə Yaponiya 1 minnə vəziri sıxanon işarəş karde ki Tramp votəşe"muzakirə de Amerkə bə İroni inkişaf bois bəbe "və ıştə bəyonoton dəvomədə votışe:əmə de Xıdavəndə xalıği lutf de Amerkə muzakirə kardeku kəno və sank siya bıə şərayetədə bə inkişaf bərəsəmon.

İslami inğilabi yolə rəhbəri,Yaponiya 1 minnə vəziri məsləhətiku de İron İslam Respublika rabitə inkişaf doeyu rozi mande və votışe:Yaponiya asiyaədə qıləy muhimmə məmləkəte və əqər de İron rabitə inkişaf doeyu meylış heste bəpe ıştə ciddiyə iradə nışon bıdə jəqo ki  bəzi muhimmə məmləkəton ım iradəşon nışon doə.

Abe Şinzo həm ım vindımonədə Tehronədə bəştə muzakiron işarəş karde və ommidvarətiş karde ım vindımon nakonəsə  ve bə həmkarətion inkişaf bois bıbo.