Ayətullah Seyid Əli Xamenei Trampış bə cəvob doe layığ nızıne.

Yaponiya Sər vəzir Şinzo Abe bə İİR səfər kardəşe. Im, çe İslamə inğilabi bə peş Yaponiya hokuməti sərdari bə İron iminə səfəre ki, məğsədış çe İroniku natə ixraci bərpo kardeye. Çunki bə Amerika elan kardə sanksiya umjən qınie bə Yaponiya iğtisadiyyati qonə zərbə jedə.

Şinzo Abe de Ayətullah Seyid Əli Xamenei didorədə Trampi bey votə piemoni bə  Ali Rəhbəri rosniəşe. Rəhbəri bımi muğabil votəşe ki, “bə Trampi hiç qıley cəvob nime, bey hiç qıley piemonən nibədom. Çunki əmə bə  çəvon sadiğəti hiç vəch bovə nimone. Çe Amerika penə məğaminə odəmon bəştə votəyon sədağət xeyli kam bıə. Bə səbəbən fikirmon ıme ki, de Amerika muzakiron barde hiç qıley mışğıli həll nibəkarde. Amerika ıştə dasto omə har curə deşmenəti de əmə kardəşe və ışətən ım koy dəvom kardedə. Hiç qıley azadə millət fişari jitono muzakirə barde ğəbul nibəkarde.”

Yaponiya Sər vəzir həmən de İİR prezident Həsən Ruhani vindemon kardəşe. Çe ım didori bə peş təşkil bıə mətbuatə konfransədə Ruhani votəşe ki, “İron hiç vaxt muharibə bino əkəni, əmo bə har qıley təcavuzi tarımar kardə cəvob bədo”.

Yaponiya Sər vəziri de İroni ıştə iğtisadi munasibəton bə səhmon eğande məğsədinə bə Tehron səfəri vaxti Omani dıyoədə 2 qılə nat kırniə kəşti bə həmlə məriz mande. Im hadisə dınyo ictimaiyyətiku qıley təşviş bə əməl vardışe. Əlbəttə Amerika və çey kali muttəfiğon bedune subut və dəlil ım həmlədə İronşon qınokar zıne, əmo dınyo beğərəzinə təhlilqəron, Rusiya analitikonən əz cumlə, ım təcavuzkarə hərəkəti bə İroni iğtisadi – siyasi mənafe zidd bıe səbəbiku bımədə ey qınokar zıne ğeyri –ciddi əməl hisob kardışone. Rusiya İnformasiya Aqentiyyət “İran.ru” nıvıştedə ki, Yaponiya Sər vəziri bə Tehron kardə səfər reqionədə siyasiə və hərbiə munağişəninə vəziyyəti həmul karde nəzərədə qətedəbe. Omani dıyoədə bə natkırinə tankeron həmlə isə bə əks məğsədi- məntəğədə vəziyyəti həniən şiddətin karde xidmət kardedə. Imən məhz bə Amerika və çey muttəfiğon nısıği mufaviğe. Bı səbəbən İroni jıqo prokativə hərəkətədə iştirak bovəkardənin ni.