Trampiku bə İroni hiyləqərə təklif
AİŞ bə İroni əleyh deşmenə siyasət bardə ən şiddətinə vaxtədə Trampi ıştə bo İroni “ən çokə dust” bıe məram bəyon kardışe, votışe ki, qirəm İron çey şərton ğəbul bıko, sərvətmand, həmən sənibəton ğudrətmandə devlət bəbe.
Jıqo məğamədə İroni İMT-ədə Daimiə Numayəndəti sərdar Məcid Təxtrəvançi elan kardəşe ki, İroni de Amerika molağat barde mumkun nıbə koe. Çunki salemə məntiğinə har qıley odəm bə çey vətəni təcrid kardə tədbiron dast ğandə devləti bə molağat ənıştıni.
İİR prezident Həsən Ruhani de Beynəlxalğə Parlamentonarə İttifaği prezident Qabriela Kuevasi didorədə ğeyd kardəşe ki, Amerika reqionədə hərbiə huzur çıvrey problemon əsasə mənbəy. Ey beynəlxalğə təşkilaton dəvət kardəşe ki, bə Vaşinqtoni təcavuzkarə siyasəti muvafiğə munasibət nişon bıdon. Həsən Ruhani həmən votəşe ki, İron muharibə bino nibəkarde, əmo bə har qıley təcavuzi layığinə cəvob bədo.
Yolə Britaniya çe AİŞ ən etibarinə muttəfiğe. Çey Xariçi Koon Vəzarəti məlumat doəşe ki, Amerika de İroni arədə hərbiə şiddəti bə kam karde məğsədi bə Tehron de Endryu Morrisoni sərdarəti numayəndə heyət vığande pidəşe.
Kuba hokumətiən de Amerika rəğabətədə çe İroni tərəfədə mande ifadə kardəşe. Çey Xarici Koon vəzir Bruno Rodriqes`i bəyon kardəşe ki, çəmə de İroni xalği həmrayəti Amerika bə çey əleyh bardə aqressivə siyasəti obaste. Əmə de beynəlxalğə huğuğə prinsipon əməl karde roy tərəfon bə həmkarəti və əmniyyəti muhafizə kardə dialoq dəvət kardedəmon.
Çe Amerika 2 qılə sandinə təhlilqər Ricard Sukuleski və Aaron Miller qıley analitikə məğalədə nıvıştəşone ki, İron vey zumand və ğodrətinə devləte. Amerika de bey hərbiə mudaxilə karde roy bəştə məğsəd nibərəse. Ey poə kardeyən ğeyri-mumkune. İroni muttəfiğon və himayədaron siyasiə zuyən bə nəzər bısənəmon bəy hərbiə həmlə bo Amerika vey boho bə sə bome, bı koədə çey tərəfdaronən ğeyr-əz İngiltərə, cəmi Ərəbıston, Ərəbiə Əmirat və İsrailo ibarəte.
