İroni milləti boştə tojə prezident vıjnişe
İroni Entexabatə Mərkəzi 13-minə prezidentə vıjniəy nəticəon elan kardəşe. Bə ım məlumati əsasən İbrahim Rəisi de əvıjınon 62 faizinə sədo entexabati iminə mərhələdə ğalib omə və çe İron İslamə Respublika prezident vıjniə bıə
Ali Rəhbər Ayətullah Seyid Əli Xamenei prezidentə entexabati de muvəffəğiyyəti dəvunie munasibəti bə İroni xalği təbrik votışe, devləti məmuron dəvət kardəşe ki, həmişə çe keşvəri və xalği xidmətədə bımandon. Ali Rəhbəri ımən veyd kardışe ki, ısətnə entexabati ən yolə ğalib İroni xalğ ıştəne, ey sənibəton çe bədxahon mıjdiə Kutləvi İnformasiya Vasiton bardə təbliğaton vədə ıştənış de ləyağəti numayiş karde.
İroni İslamə Respublika Prezident Həsən Ruhaniən bə İroni milləti ım vıjniəyədə numayiş kardə vəhdəti, ım tədbirədə kullən iştiraki bənə bə islamə inğilabi idealon sədağəti numayişi ğıymət doşe. Ey həmən bə İbrahim Rəisi de ım ğələbə munasibəti təbrik votışe, keşvəri tərəğği və inkişafi roədə bey muvəffəğiyyət orzu kardışe.
Rusiya Prezident Vladimir Putiniən bə İbrahim Rəisi təbriknomə vığandəşe, jıqo qıley umu izhar kardəşe ki, Rusiya və İron devləton arədə konstruktivə həmkarəti əlağəon həmə sahonədə , əzcumlə beynəlxalğə arenadə çimi bə peşən inkişaf bəkarde.
Azərbaycanə Respublika Prezident İlham Əliyeviən de ım ğələbə munasibəti bə Rəisi təbrikə məktub vığandəşe. Əyo ğeyd kardəşe ki, Azərbaycanə Respublika bə İron İslamə Respublika munasibəton məxsusi əhəmiyyət dodə, çunki de İroni tarixi, dini və mədəni obastış heste. Haliyədə çəmə əlağəon bə strateji həmkarəti səviyyə barz bıə, əmə ımi de məmnuniyyəti ğeyd kardedəmon. Bovəmon heste ki, Azərbaycan- İron dustiəti və həmkarəti munasibəton bə çəmə xalğon və keşvəron mənafe muvafiğ çimi bə peş həniən ğoym və hevuj bəbe. Əliyevi ıştə məktubi orəxədə bo Rəisi consəloməti, xoşbəxti , dust və bəradərə İroni xalği rifahi ro jıqo məsulinə fəaliyyətədə nailiyyəton orzu kardəşe.
İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.
