Nuyə sorədə bıə Tehroni cımə nımoji xətib: Amerkə ımsor həm bəpe İroni vədə xarəkə məğlubiyəton intizorədə bıbu.
Tehroni zinə ruji cımə İmomi xətib bə iğtisodi cəhəto Amerkə anti İron kompaniya və fişor-təziğon məğlubiyəti işorəş karde iyən votışe: 1401 minnə sorədə həm Amrkə bəpe İroni vədə xarəkə zəlilə məğlubiyəton çəş ko.
Bə İrna raporti əsos, Ayətullah Seyd Əhməd Xatəmi nuyə sorədə bıə Tehroni i minnə cımə nımoji xutbəonədə ki zinə İmom Xomeyni nomo bıə musəllaədə bərpo bıə votışe: İroni Yolə Rəhbəri tərəfo Soron numi təin karde qıləy şuar ni bəlkəm bo millət iyən nizami bənə roy plan və bərnoməy.
Xatəmi əlovəş karde: bə elm fəaliyəton iyən ko icod karde əsos bıə istehsoli məno ıme ki bə istehsol bəpe elmi diyə bıbu, boçi ki de ın şivə istehsoli xərcon kam kardey bəbe, məhsulon ğəymət kam bedə və rəğabəton kənoədə rovnəğ iyən ko icod bəbe.
Tehroni zinə ruji cımə İmomi xətib bə dəvardə 10 sori mıddətədə bıə İroni Yolə Rəhbəri tərəfo harsornə sori şuaron bənə iğtisodi məsələon vıjniye işorəş karde və təkidış be: ın vey muhimmə məsələy və dışmon həm pidəşe ki iğtisodi səmtiku bə İron zərbə varid ko, əmmo jəğo ki sədre islomədə mınofiğon və dışmenon hərəkəton benəticə mandə, ısət həm çəvon koy bə hədərə bəşe.
