Bə Ermənistoni İroni ğazi ixracat əlovə bey

Bə Ermənistoni İroniku qaz ixrac bey tojə təvafuğnomə imzo bıə ki bə çəy əsos, ixrac bıə qazi miğdor əlovə bəbe.

Bə İrna raporti əsos, bə Erməniston İroniku qazi ixracati tojə sənəd de İroni qazi milli şirkəti yol iyən nati vəziri muavin Məcid Çəqni, İrəvani elektriki stansiya mudir Aram Ğazariyan iyən Ermənistoni strukturon iyən məntəğə mudiriyəti vəzir və Ermənistonədə İroni Respublika səfiri iştiroki imzo bıə.

Bə ım sənədi əsos, bə Ermənistoni ixracati qazi miğdor əlovə peydoş kardə və ım sənədi mıddət tosə 2030 minnə sor əlovə bıə.

İroni qazi ixracati lulə xət zərfiyətış heste ki har sor bə Erməniston 1 milyard kub metriku vey təbii qazi ovoştoniyə əncom bıdə ki holi hazırədə ım zərfiyətiku fəğət təğribən 35 faiz istifodə bıə.

De dust iyən məntəğə kişvəron və hamsuyəon rabitəon hevujəti İroni devləti xarıci siyasəton vey muhimmə koonku elan bıə.

İron bə coqrafiya mıvğiyəti xoto, 15 qılə kişvər hamsuyə kişvər soybe, və de hamsuyəon və məntəğə kişvəron rabitəonədə ıştə həmmə zərfiyəton əcumlə iğtisodi, ticori, sənaye, mədəni və turizm zərfiyəton əktiv kardey bois bəbe ta rabitəon bə inkişof bırəse və ım ko bə vırə rosniye bois bəbe ta məntəğədə əmniyyət  və sulh icod bıbu.