Pars Today

Tehroni mıvəğğətə cumə İmom təkidış kardə: Suriyədə Amerkə təcavozkaranə hərəkəton de həmmə beynəl xalğiyə ğanunon ləğv karde bərobəre.

Huccətul İslam Vəlmoslımin Kazım Seddiği Tehroni zınə ruji cumə nımoji xotbəonədə ijən Amerkə bə Suriyə təcavoz karde hərəkəti məhkumış kardə ki de be əsosə bəhonəon bino bıə və təkidış kardə: Suriyə dıvlət kimyabiyə silohonku istifodə karəş ni ijən Amerkə jıqonə vəhşiyanə və i tərəfiyə hucum be icozə və qıləy duə iddiyaon bəpeştə əncom bıə ki de beynəl xalğiyə ğanunon bərobər ni, çən lozime dınyo kişvəron jıqonə təcavozon vədə mane bıbon.

Seddiği ijən təsdiğış kardə: İroni millət və silohinə ğıvvon çı deşmənon harcurnə ehtımaliyə təcavozi vədə deştə imon, milliyə iğtidor və imkonaton zumand və pəşimon əkə reaksiya və cəvob bədon.

Tehroni mıvəğğətə cumə İmom Yəmənədə Ərəbistoni təcavoz və cinoyəton barədə çı i bıə milləton və co təşkilaton sukuti barədə tənğidış kardə və votışe: yəğin Ali-Səud və çəy həmpeymonon jıqo Yəmənədə bepənohə milləti ğətliam karde və məzlumə cəmaəti kışte nəticəon və cəzoon bə vinde.

Tehroni cumə nımoji xətib ıştə sıxanon co baxşədə omə prezidentəti səçınədə ijən İrondə şəhr və diyon intixabati astanədə İroni milləti əzəmətinə huzur və iştiroki İroni kişvəri səbarzəti, deşmənon dılədə tars icod əkə və kişvəri qarantiya əkə zınəş bıə ijən təkidış kardə: səçınədə iştirok karde məna milləti ujnən de İroni islamiyə nizomi əhd dəbaste heste.