Pars Today

İroni Tele-Rədioədə çı İroni prezidenti səçıni namzədon bərnoməon və debaton ijən çəy kəynə pəxş karde faxti təyin kardero pışk ğande mərasim de namzədon nımoyəndəon huzuri İroni Tele-Rədio təşkilati vırədə bərpo bıə.

Bə İrna raporti əsos həminə marasimədə ki sərost və bəjiyə halətədə İroni bəzi Tele-Rədio kanalonədə pəxş bəy İroni Tele-Rədioədə 6 qılə namzədon təbliğiyə bərnoməon faxt və tərtib mıəyyən bıə.

Həminə bərnoməon Aprili 26 detosə Mayə manqi 17 minə ruj İroni Tele-Rədioku pəxş bəbe ki 3 qılə bəjiyə debaton həm Aprili 28, Mayə manqi 5 və 12 minə rujonədə de ictimaəti, iğtisodi və siyasiyə mehvəron çəy dılədə iborəte.

Ğeyd bıə ki har qılə namzəd Rədioədə 555 və Releveziyadə həm 555 dəğiğə bərnoməonış heste.

De tərtibi və de diğğət bə debaton, qırd har qılə namzəd bə 1470 dəğiğə nızi İroni telerədio təşkilati kanalonədə karde bəzne ıştəni təbliğ və təğdim bıkə.

İroni Tele-Rədio təşkilati sədr Əbdull Əli Əliəskəri ım mərasimədə bə Tele-Rədio təşkilati be tərəf mande ijən səçınədə mediya cəhətədə ədoləti rioyət karde işarəş kardə və votışe: ım təşkilat ıştə həmmə zərfiyətiku istifodə kardedə ta millət çımiku vey de prezidentəti namzədon oşno bıbun.

İroni sər prokoror Huccətul İslam Muhəmməd Cəfər Montəzıri həm votışe: İronədə prezidentəti səçıni əhəmmiyət bə çəy xotoe ki millət pidəşe ıştə kişvəri vey aliyə icra əkə şəxsi bo omə 4 soriro bevıjno.

Əv həmmə namzədonku tələbış kardə ki hozzo kardə bıə fırsətiku komilə istifodəşon bıbu ta millət qıləy hərorətin, əzəmətin və deşməni nomid əkə səçıni bənə dovarde dıvrəon xəlğ və təşkil bıkən.

Montəzıri bə namzədon tosiyəş kardə ki de islamiyə ğanun və əxloği əslon rioyət karde səçınədə təbliğ bıkən ijən votışe: jıqo intizorımon heste ki namzədon ıştə bərnoməon və ıştəni təbliğ karde xoto bə İroni Yolə Rəhbəri sıxanon diğğət və əməl bıkən.

Bə İroni səçın mərkəziyə kamissiya elanon əsos bo omə prezidentəti səçıniro ki ğərore Mayə manqi 19 ədə de şəhron və diyon səçıni həmzəman bərpo bıbu, Seyyed Mustəfa Ağa Mirsəlim, Eshağ Cəhanqiri, Həsən Ruhani, Seyyed Ebrahim Rəisi, Muhəmməd Bağır Ğalibaf və Seyyed Mustəfa Haşemitəba çəvon səluhiyət təsdiğ bıə.