Mosuli ozod karde bəpeştə İron və məntəğə kişvəron rəsmi şəxson təbrik mesaj.

İroni xarıci vəzarətxanə sıxənəvot Mosulədə Daeş terroristiyə qrupi yolə məğlubiyəti təbrik votışe ijən terrorizmi puli və fikiyə əğidəon rişə hışk karde tələbış kardə.

Bəhram Ğasımi tojədən Mosulədə Daeşi qonə məğlubiyəti ki İraği millət, dıvlət, hərbion və dovtələbə ğıvvon mığoviməti sayədə bə dast omə, bə İraği dıvlət və millət, şiə mərcəiyyət həmmə din-məzhəbon alimon, ğıvvon, silohinə ğıvvon iyən Həşd Əlşəbi ğıvvon təbrik votışe və qıləy demokratik, i və zumandə İraği çərçivədə çın kişvəri stabiləti, əmniyyət, oromətəti və rifohış tələb kardə ki ijən bə məntəğədə mığovimət iyən de terrorizm mubarizə barədəro foydəş bıbu.

İroni xarıci vəzir ijən elanış kardə ki İron kamilən hozzo mandə ta terrorizmi kamilən məhv kardero bə məntəğə dıvləton və milləton komək bıkə.

Çımiku bə nav İroni prezident Ruhani həm ıştə təbrik mesajədə Mosuli çı Daeş terroristiyə qrupi dastiku ozod karde muhimmə hadisə bə İraği prezident, iminə vəzir və İraği şiəyon aliyə mərcə təğlid Ayətullah Sistani təbrik votəş bıə.

İraği hərbion 5şambə Mosulədə bə Əlnori məçit rəsən və bə Heydər Əlebadi votəyon əsos həminə məçiti ozod karde məna yəni Mosulədə Daeşi umər bə oxo rəsə.

Daeşi sərkərdə Əbubəkr Əlbəğdadi 3 sor çımiku bə nav həminə məçitədə ıştə xilofəti elanış kardə be.