Pars Today

İroni yolə ali sər komandan Hicri Şəmsi Azərə manqi 7 ədə bıə dıyoiyə ğıvvon ruji bo ım ğıvvə qıləy fəxr iyən səbarzəti hisobışon kardən ki bə çəvon fidokarətion ğədrdonəti kardero bənə simvolinə ruje.

İroni yolə ali sər komandan Həzrəte Ayətullah Xamenei zinə çı İroni ərtış dıyoiyə ğıvvon fərmondəhon iyən rəsmi şəxson cəmədə təkidışon kardən: Hicri Şəmsi 1359 sori Azərə manqi 7-ədə bə İraği səddam rejimi əleyh İroni dıyoiyə ğıvvon cəsuranə əməliyot canqədə vey əbədiyə təsirış be və həmonə ciqəmandə hərəkət dıyoədə çı dışmeni plan, əməl, əhotə iyən navəjə kamilən məhv kardə.

Həzrəte Ayətullah Xamenei bə Azərə manqi 7 ədə bıə əməliyoti yod iyən xatirə ijən çəy ğəhrəmanə şəhidon ehtıromi oqəte təkid iyən əlovəşon kardən: xıdo roədə şəhodət xəsorət ni bəlkəm qıləy ğəniməte ijən bə İmom Xomeyni(r)-i votəyon əsos har millət ki şəhodətış bıbu əsorətış nibəbe.

İroni Yolə Rəhbər bə İroni dıyoiyə ğıvvon əhəmmiyət işarə iyən təsdiğ kardən: bə İron mudafiə kardero dıyoiyə ğıvvon çı navnə cəhbədə hestin ijən bənə Mokran məntəğə, Omman dıyo və ozodə muhimmə ovonədə huzzur peydo karde bəzne ki bəbe heju dəvomış bıbu.

Həzrəte Ayətullah Xamenei dıyoiyə hərbiyon iyən təchizaton ğudrət ziyod karde ijən bo maneon peğəteyro İroni Nizomi həmmə zərfiyətonku istifodə karde əhəmmiyət və zəruriyət işarəşon kardən iyən votışone: İroni dıyoiyə ğıvvonədə vey çokə hərəkət iyən ozavziye bino bıə ijən dəvardə 20 sori muğayisədə ımruj ım ğıvvə vey bə inkişof rəsə əmmo vəs ni, iyən həmmə sahəonədə bəbe de iradə, ruhiyə, cəhd, əməl iyən navəjə planon ım de rəyrə bıə hərəkət dəvom peydo bıkə.