Bə şərifə Ğudsi zid Trampi ğərol bə islam dınyo zərbə varid kardeku çı siyoniston iyən Amerkə plani i baxşe.

İroni prezident, Amerkə prezidenti ğəroli siyonist rejimi paytəxti əvəz karde barədə ğeyri ğanuni və beədəbanə hisobış kardə ijən votışe: Trampi ğərol məntəğədə qıləy tojə bohrani bois bəbe və əqə mısılmonon ıştə i bemoni sayədə əməl bekon yəğin bo Fələstin iyən islam dınyo millətonro yolə səbarzəti bəbe.

İroni prezident Həsən Ruhani Mehr Abadi airportədə bə Tırkiyə səfər kardero bə nav Fələstin məsələş çı islam dınyo i minə mıvzo hisobış kardə ijən təsdiğış kardə ki: ımruj bo mısılmononro vəhdət yeqanəroe və həmmə kəson bəbe çı Amerkə ğələtə ğəroli vədə i bıbun və əy məhkum bekon.

Ruhani əlovəş kardə: Ğuds qıləy sərzəmin və şəhre ki bə mısılmonon, xərstinon və yəhudiyon aide və bo siyonistonro hiç vırəe ni.

İroni prezident ıştə bə Tırkiyə səfəri bərnomə və hədəfon barədə votışe: ım səfər de Tırkiyə prezidenti dəvət əncom bıə ki islamiyə həmkari təşkilati dıvrəiyə rəise ijən İstanbulədə ım izteroriyə iclosədə ğərare şərifə Ğudsi barədə muzakirə və suhbət bıbu.

Ğeyd kəmon ki ım iclos ımruj bərpo bəbe və İroni prezident zinə şəv bə İstanbul varid be.

Dınyo islamiyə kişvəron aliyə koşınason çımiku bə nav ım iclosi bəyoniyə və bərnoməon barədə muzakirə kardəşone.

Amerkə prezident Donald Tramp Dekabri 6 Ğudsi bənə çı siyonist rejimi paytəxt elanış kardə ım ğərol dınyoədə cəmaəton islami və ğeyri islamiyə kişvəron rəsmi şəxson iyən muxtəlifə beynəl xalğ təşkilaton reaksiyaon bois bıə.