Pars Today

Bə Amerkə nakonə prezdent iyən Amerkə Milodi 2024 minnə sori prezdenti səçıni respublikaçi nomizəd, Donald Trampi qulə ğandey hodisə bəpeşt, co kərə İronofobiya cəhəto, Amerkə kali mediyaon, ım hodisədə İroni rol ifo kardey iddio kardışone. ım ko de Tehroni ğoymə mənfiyə reaksiya dim bə dim bıə.

İyulə manqi 13 minnə rujədə, Amerkə Pensilvaniya ştat Batler şəhrədə, qıləy şəxs ki 20 sornə cıvon və çəy nomış Mətiyo Krooks be bə Tramp səmti çand qullə ğandəş be ki ım qulləonku qıləyni bə bə sabiğ prezdenti rostə quşi qıniyə.

Amerkə CNN televeziya kanal Seşəmbə rujədə iddioş kardə ki dəvardə haftəonədə ım kişvəri kəşfiyoti rəsmi şəxson, Amerkə sabiğə prezdent Donald Trampi kışteyro, İroni səmtiku ehtımoliyə planon kəşf kardışone. ım Amerkə mediya eyni holədə ıştə reportajədə vardəşe ki insoni mənbəonku bə dast omə məlumaton boyis bıə ta dəvardə haftə mıddətədə rəsmi şəxson Trampi ətrofədə əmniyyəti şəroyiti ziyod bıkon.

Həminə məsələ barədə İ Bıə Milləton təşkilotədə İron İslom Respublika mımoyəndə qıləy bəyoniyə ğəlibədə elonış kardə: "bə İroni İslomi Respublika nəzə əsos, Tramp qıləy cinoyətkorə qınohkore ki bə Sərdor Ğasım Suleymani terrori əmri sadir kardey xoto bəpe məhkəmədə mıhokimə bıbu, İron, Trampi cəvob doeyro, huğuği roy vıjnişe".

İjən həminə məsələ barədə İroni rəsmi şəxson əcumlə İroni xarıci vəzorətxonə səyvon, Əli Bağıri Kəni iyən İroni xarıci vəzorətxonə sıxənəvot, Amerkə ım iddio rəd kardışone iyən jığo iddion siyosi ğərəzinə motivasiya və hədəfon soyb bey zıneşone.

Həğiğətədə Amerkə  ki dəvardə soronədə de veyə siyosi vızmətion dim bə dim be ım vızmətion oşkoə daxıli amilon və illəton peydo kardey əvəzi, co kərə cəhd kardedə ta xarıci amilon əcumlə ım hodisədə İroni mıttəhəm kardey dumoədəy.

Im qıləy holədəy ki bə Tramp qullə ğandey, bəpe Amerkədə siyosi vızməti ziyod bey simvol zıneydəmon  ki dəvardə soronədə xususi Milodi 2021 minnə sori Yanvari 6 minnə rujədə de Trampi tərəfdoron vositə bə Amerkə konqresi həmlə bəpeşt əlovə peydoş kardə.

Bə Amerkə torix diyə kardey nışo dodə ki Amerkə iştimoiyəti və siyosi əktivə şəxson və siyosi rəsmi şəxson həmişə ım kişvərədə terror və siyosi vızməti hədəfonku bin, əcumlə Milodi 1963 minn sori Texas ştatədə Con Kennedi terror, Milodi 1968 minnə sorədə, Kaliforniyaədə Robert Kennedi terror iyən Milodi 1968 minnə sorədə Tənnessi Memfisədə Afro- Amerkəvıjon mədəni huğuğon hərəkəti rəhbər, Martin Luter Kinqi terror.

Bə həminə əsos bəpe bıvotəmon ki qıləy kişvərədə ki prezdent, prezdenti səçıni nomzəd və mədəni mubarizəon rəhbəron terror bin, Donald Trampi nomuvəffəğə terror qıləy mislış nıbıə terror bə hisob omeydə ni.

İjən bə Royterzi referendumi oxonə nəzəon əsos, Donald Trampi terrori hodisə bəpeşt, Amerkə milləti niqəronion vey ziyod bıə və Amerkə millət niqəronin ki Milodi 2024 minnə sori Noyabrə manqi 5 minnə rujədə,  Amerkə prezdenti səçıni nəticəon de vey siyosi vızmətion bə ico bıbu.