Tehroni iclosədə de sionist rejimi rabitəon normal kardey məhkum və bə Ğudsiku himoyədorəti təkid be.
Tehronədə bıə "məzhəbiyə ixtilafon kam karde iyən Fələstini orzonku mudafiə kardeədə siyosiyə Fəalon və partiyaon rol" nomo bıə iclosi oxonə bəyoniyədə de sionist rejimi rabitəon noramal karde məhkum və bə Ğuds iyən Fələstini himoyədorəti karde təkid be.
Bə Telerədio raporti əsos, iştirokəkəon ım iclosədə zinə ruji bə islamiyə kişvəron partiyaon miyono əloğəon islam dınyoədə vəhdəti zəruriyət və bo muğaviməti ğələbə cəmyəton siyasi və fiki əsoson inkişof doe təkid kardən.
Im bəyoniyə de təkid bə məzhəbiyə bıhronon və məzhəbiyə ifrotiyə hərəkəton kam kardey iyən bə muğavimət və Fələstini mıvzoədə siyasiyə həmkarion inkişof doe zəruriyət işarə və əlovə be: Fələstin və muğavimət mehvəri mıvzoədə Ğudsi işğolkorə rejimi canq icodəkə rəftor və Amerkə istikbariyə əhvoli vədə siyasiyə təşkilaton vəhdət iyən məsuliyət hiss karde lazime.
Im iclosədə iştirokəkəon ijən islam dınyoədə bə siyosiyə fəalon vəhdəti zumandəti və partyaon bə ico hərəkət karde təkid və elanışon karde: de dınyo istikbor və sionisti mubarizə barde dınyo siyosiyə fəalon ittifoğon iyən həmkari karde zəruriye.
Im bəyoniyədə "beytul mığğəddəs" bənə Fələstini kişvəri daim və əbədiyə paytəxt bənə əvəz nıbıə strateqiya təkid bıə və omə: bo partiyaon və siyosiyə fəalon Fələstin və muğavimət mehvəriku himoyədorəti kardey qıləy əsliye strateqiyae.
Im iclosədə iştirokəkəon məzhəbon miyono nez bey beynulxalğiyə iclosiku tələb kardeşone DAEŞ-i icod karde, Yəmənədə həmləon dəvom karde barədə sionist rejimi və Ale-Səud rejimiku himoyədorəti karde xoto bə Amerkə əleyh şikayəti tənzim bıkən və detosə məhkumiyət və ziyoni əvəzi doe əy təğib bıkən.
Im bəyoniyə oxoədə məzhəbon miyono nez bey beynulxalğiyə iclosiku tələb be Tehroni iclosiyə loyhəon de dəftərxonə icod karde təğib bıbu.
