De İmom Həsən Mıştəbo(ə) şəhodəti məxsus
De İmom Həsən Mıştəbo(ə) şəhodəti məxsus
İmom Həsən(ə) bə mərdumi de mıoviyə mıborizə bardero çəyku himoyə nıbey dəlili xoto,Hicri-Ğəməri 41-ə sori noçor mande de mıoviyə sulhi sazışi ğəbul bıko.İmom Həsən(ə) hiçvaxti mıoviyəş təyid iyən təsdığış nıkarde,bəlkəm dayima mıoviyə tənğıdi koyku dastış nıkəşe və hejo deştə bəyonot iyən hərəkəton elon kardedəbe ki,çe mıoviyə xilofətış bə rəsmiyyət nızınışe.ə həzrəti de mıoviyə,deçəy muzduron iyən deçəy tərəfodoron bıə mınozirə iyən debaton çın məno şoyde.ə həzrət bənə mıoviyə bıə qıləy fərdi canq kardey bəsə sulhisə tərcih iyən barz qəteydəbe. çoko ki,İmom Həsən(ə) bə sulhi tənğıdəkəyon xitobən jıqo hamyeşone:”ehyanə qıləy koməkım bıəbe,bəşəv-bəruj deəy canq əkim ta ko idəfənin bıbu”. və mıoviyə xitobən jıqo hamyeşone:” Əqər canq ğərol bıbu,har kəsisə bənav az detı canq bəkardem.çun detı canq kardey bəsə de xəvarici bıə canqisə vey lozıme”.
Həyğətədə İmom Həsəni(ə) sulh çe İslomi sədr iyən sıftədə bıə torıxi hodisəonku be ki, bərrəsiəkə iyən mıhəğğiğon çəy barədə ziyodə sıxan votəşone iyən veyə risolə iyən kitobonışon nıvıştə və həyğətonışon ruşin kardə. əvon həmmə bə ın nəticə rəsən ki,İmom Həsən(ə) de şucoəti iyən deştə saziş ğəbul nıkardə ruhiyyə,hejo çe sıftənə rujonku bo ğıyom iyən viloyəti marzon xandi kardero,qıləy hozzıətiş hestebe və hiçvaxti çə həzrəti bərnomədə qıləy sulh iyən sazışi məsələ nıbe.liza mıoviyə çe şamiku bə Kufə səmt hərəkəti xəbəş məse,dəsturış doe ki,mərdum məçitədə cəm bıbon.peso ə həzrəti qıləy xutbəş bino karde və bə mıoviyə ləşkəri hozzıəti işorə kardey bəpeşt,millətış bə Xıdo royədə cihod iyən de botıli tərəfdoron mıborizə koyədə mığovimətiş dəvət karde və səbr,fədokorəti iyən bə saxtiyon tov vardeyış tevsiyə kardeşe.İmom Həsən(ə) de mərdumiku bıə məlumot iyən xəbədoəti ki,hesteşbe,norohət be ki,əvon çəy dəvəti ğəbul nıkon.hejo jəqo həm be və çə həzrəti həyəconinə xutbə bə oxo rəsey bədiqə,həmmə kəsi sukutış ixtiyor karde,tam mandin və əvon çe həzrət İmom Həsəni(ə) sıxanışon təyid və təsdığ nıkardışone.İraği mərdum seqlə Cəməl,Siffeyn iyən Nəhrivoni canqi bədiqə oqıniye itərəfiku,çe İmom Həsəni(ə) ləşkərədə ziddiyyətinə fərdon mevcudiyyət həm co tərəfiku,həmçinin çə həzrəti ləşkəri komandanon xəyonət həm səbəb be ki,İmom(ə) ın sulhi ğəbul bıko.çoko ki,çe həzrət İmom Həsəni(ə) ləşkəri sərkərdə Ubeydullah ibn Əbbos,çə həzrəti ləşkərış tərk karde və bə mıoviyə anqıl qıniye.İmom Həsən(ə) ıştən qıləy sıxanədə jıqo hamyedə:”mı bə ın dəlili xoto hukumətım bə mıoviyə ehdəm noe ki,bo deəy canq kardero qıləy koməkım nıbe.əqər qıləy duston və koməqım bıəbe,bəşəv-bəruj deəy canq əkardim ta ko idəfənin bıbu”…
